ԵՐԵՎԱՆ, 19 նոյեմբերի — Sputnik. SMP Racing — ի օդաչու Մաթևոս Իսահակյանը երկրորդ տեղն է զբաղեցրել պատմության մեջ վերջին «Ֆորմուլա V8 3.5»-ում, հայտնում է «ՌԻԱ Նովոստին»։
Նոյեմբերի 18-ին Բահրեյնում կայացավ «Ֆորմուլա V8 3.5»-ի եզրափակիչ փուլի երկրորդ մրցարշավը, որում հաղթեց Lotus թիմի ավստրիացի օդաչու Ռենե Բինդերը։
Ավստրիացին 23 շրջան արեց 42 րոպե 29,001 վայրկյանում։ Երկրորդը դարձավ նրա թիմակից՝ բրազիլիացի Պյետրո Ֆիտիպալդին (+2,542 վայրկյան)։ Եռյակը եզրափակեց կոլումբիացի Տատյանա Կալդերոնը (+13,573), որը հանդես էր գալիս RP Motorsport-ի կողմից։ Իսահակյանը իններորդն էր (+1.25,427), իսկ նրա թիմակից Կոնստանտին Տրեշենկոն չկարողացավ ավարտել մրցարշավը։
Առաջնության ինը փուլերի արդյունքում Իսահակյանը հավաքեց 215 միավոր ու երկրորդ տեղը զբաղեցրեց՝ զիջելով միայն Ֆիտիպալդիին, որը ուներ 259 միավոր։ Երրորդ տեղը զբաղեցրեց մեքսիկացի Ալֆոնսո Սելիսը (204 միավոր)։
Ուրբաթ հայտնի դարձավ, որ «Ֆորմուլա V8 3.5»-ի կազմակերպիչները որոշում են կայացրել դադարեցնել այս մրցարշավն անցկացնելը՝ մրցարշավորդների ու երկրպագուների հետաքրքրության պակասի պատճառով։
