ԵՐԵՎԱՆ, 26 հոկտեմբերի — Sputnik, Լաուրա Սարգսյան. Հայաստանից Ռուսաստան տեղեկատվության ամենամեծ հոսքն արձանագրվել է 2016 թ. ապրիլյան իրադարձությունների ժամանակ: Այս մասին Sputnik Արմենիային տված հարցազրույցում ասաց Լոմոնոսովի անվան Մոսկվայի պետական համալսարանի Ժուռնալիստիկայի ֆակուլտետի լրատվամիջոցների տեսության և տնտեսագիտության բաժնի դոցենտ Անդրեյ Վիրկովսկին:
Դասախոսը Հայաստան է ժամանել Լոմոնոսովի անվան Մոսկվայի պետական համալսարանի երևանյան մասնաճյուղի հրավերով, որտեղ նա դասախոսություններ կանցկացնի:
«Վերջին մի քանի տարվա ընթացքում Հայաստանից Ռուսաստան տեղեկատվության հզոր հոսք արձանագրվեց ռազմական գործողությունների վերջին ակտիվ բախումների ժամանակ: Այդ ֆոնին Ադրբեջանը թույլ էր ներկայացված», — ասաց Վիրկովսկին:
Ըստ նրա, այդ ժամանակ զգացվում էր, որ Հայաստանի քաղաքականությունը մանրակրկիտ էր մտածված: Այնուամենայնիվ, հայկական ԶԼՄ-ները, ինչպես նաև աշխարհի այլ լրատվամիջոցները, այսօր գոյատևման խնդիր ունեն:
Նա համոզված է, որ այս ոլորտում Հայաստանի հիմնական ուժը հզոր «սփյուռքային մեդիան» է, որի ճիշտ օգտագործումը թույլ կտա լրատվամիջոցներին Հայաստանում տեղեկատվական կամուրջ ստեղծել այն երկրների հետ, որտեղ կենտրոնացած են հայերը: Վիրկովսկին համոզված է, որ Երևանը պետք է օգտագործի այդ ներուժը հայ-ամերիկյան, հայ-ռուսական և այլ երկրների միջև տեղեկատվական շփումներ հաստատելու համար:
«Սա հայկական մեդիադաշտի առանձնահատկություններից մեկն է, որով տարբերվում է շատ երկրների, մասնավորապես, ԵԱՏՄ-ի անդամ երկրների լրատվամիջոցներից», — ասաց նա:
Փորձագետը կարծում է, որ ԶԼՄ-ները ճգնաժամ են ապրում: Ավելի ու ավելի շատ մարդիկ են հրաժարվում ավանդական լրատվամիջոցներից:
Վիրկովսկին կարծում է, որ 15-20 տարի անց աշխարհն այլ տեսք կունենա, քան այսօր: ԶԼՄ-ները ստիպված կլինեն միանալ սոցիալական ցանցերին: Կստեղծվի տեղեկատվական հոսքի նոր կառուցվածք:
