ԵՐԵՎԱՆ, 20 հոկտեմբերի. — Sputnik, Լաուրա Սարգսյան. Հայաստանի ուսանողները լավ տպավորություն են թողնում, հատկապես մաթեմատիկական գիտելիքների առումով: Այս մասին Sputnik Արմենիայի թղթակցի հետ զրույցում ասաց Ռուսաստանի Գիտությունների ակադեմիայի ակադեմիկոս Ալեքսանդր Նեկիպելովը:
Հայտնի գիտնականը Հայաստան է եկել Մոսկվայի Լոմոնոսովի անվան պետական համալսարանի երևանյան մասնաճյուղի հրավերով, որտեղ նա դասախոսություններ է կարդալու:
«Հայաստանում ուսանողները լավ տպավորություն են թողնում, հատկապես նրանց մաթեմատիկական պատրաստման առումով: Տնտեսագիտության տեսության ուսումնասիրման համար, որը ես իրականում սովորեցնում եմ, դա շատ կարևոր է», — Sputnik- ի թղթակցի հետ զրույցում ասաց Նեկիպելովը:
Նա ռուս և հայ ուսանողների միջև տարբերություն չի տեսնում, ասում է` նրանց պատրաստության մակարդակը նույնն է: Նեկիպելովն ասում է, որ Հայաստանը մեծ ապագա ունի և վստահ է, որ այդպիսի երիտասարդության ունեցող երկիրը հաստատ չի կորչի:
«Հայաստանը երբեք զուրկ չի եղել խելացի մարդկանցից, և այսօր գիտության ու կրթության բնագավառում առաջատար փորձագետների թվում շատ հայեր կան. Օրինակ` Ռուսաստանի Գիտությունների ակադեմիայի վերջին ընտրություններում «օտարերկրյա անդամի» կարգավիճակ ստացավ ՀԳԱ նախագահ Ռադիկ Մարտիրոսյանը»,- ասաց Նեկիպելովը:
Նա պարզաբանեց, որ այդ կարգավիճակը ստանում են միջազգային բարձր մակարդակի գիտնականները: Նեկիպելովը համոզված է, որ Հայաստանի պես երկրում չի կարող լինել կադրային կոլապս: Հայաստանը մեծ ներուժ ունի, բայց թերի զարգացած տնտեսության պայմաններում այդ ներուժի իրացման հնարավորություն չկա:
«Կարևոր է, որ կադրերը պահանջարկ ունենան սեփական երկրում, իսկ դա պահանջում է, որ տնտեսության կառուցվածքում արմատական փոփոխություններ կատարվեն», — ասաց Նեկիպելովը:
Փորձագետը համարում է, որ այս հարցն աստիճանաբար լուծվում է: ԵԱՏՄ անդամակցությունից հետո բիզնեսի ավելի ու ավելի շատ ներկայացուցիչներ են շահագրգռված Հայաստանում ռուսական կապիտալով ընկերություններ բացելու հարցում: Դա կօգնի հայ մասնագետներին իրենց ներուժն իրացնել հայրենիքում:
«Հայաստանը փոքր շուկա ունեցող երկիր է և չի կարող ժամանակակից, բարձր տեխնոլոգիաների ոլորտի արտադրություններ ստեղծել միայն իր ուժերով: Այդպիսի արտադրությունները մեծ շուկաների պահանջարկ ունեն», — ասել է Նեկիպելովը:
Հայաստանի և միության այլ երկրների համար այս հեռանկարը բացում է ԵԱՏՄ-ն, որի բազայի վրա հնարավոր կլինի իրականացնել հետաքրքիր նախագծեր, որոնք շոշափելի արդյունք կունենան Միության բոլոր երկրներում:
ԵԱՏՄ-ն Մաքսային միության և ընդհանուր տնտեսական տարածքի հիման վրա ստեղծված ինտեգրացիոն տնտեսական միություն է: Գործում է 2015 թ. հունվարի 1-ից: ԵԱՏՄ-ի անդամներն են Ռուսաստանը, Հայաստանը, Բելառուսը, Ղազախստանը և Ղրղըզստանը:
