ԵՐԵՎԱՆ, 5 հոկտեմբերի — Sputnik, Լաուրա Սարգսյան. Սերգեյ Մինասյանի` Վրաստանում Հայաստանի դեսպանի պաշտոնում նշանակվելու պատմությունը երկու երկրների նախարարությունների և կառավարությունների դիվանագիտական սխալն է, համարում է Վրաստանի նախագահի աշխատակազմի նախկին ղեկավար Պետրե Մամրաձեն:
Վրաստանի և Հայաստանի ԶԼՄ-երը դեռ ամռանից ակտիվորեն քննարկում են Սերգեյ Մինասյանի նշանակումը Վրաստանում Հայաստանի դեսպանի պաշտոնում: Նախօրեին վրացական մամուլը տեղեկություն է հրապարակել, որ Մինասյանին հրաժարվել են հավատարմագրել, սակայն Վրաստանի և Հայաստանի ԱԳՆ-ները կոչ են արել չշահարկել թեման` հայտարարելով, որ դեսպանների հետ կապված որոշումները միշտ էլ հրապարակային են: Այնուամենայնիվ, հարցի պատասխանը դեռ անհայտ է:
«Անհնար էր ամեն ինչ բերել հանրային քննարկման: Դա երկու կողմերի դիվանագիտական վրիպումն է, որը կարող է արագ լուծվել, եթե լինի բարի կամք», — ասել է Մամրեձեն Sputnik Արմենիայի թղթակցի հետ զրույցում:
Նրա խոսքով` դիվանագետին ագրեման տրամադրելու հետաձգումը և այդ հարցի հանրային քննարկումը նշանակում է, որ դիմողը չի նշանակվելու: Այնուամենայնիվ, և այստեղ կարելի է բացառություն անել, եթե հարցը լուծում ստանա բարձր մակարդակով, կարծում է փորձագետը:
«Դժվար է պատկերացնել, որ այս հարցում մեղավորը վրացական կողմն է: Սովորաբար այդպիսի բան չի լինում, հատկապես բարեկամ երկրների միջև: Դեսպանի թեկնածության հարցը սովորաբար ամփոփվում է բանավոր կերպով և միայն դրանից հետո տեղեկատվությունը տրվում է ԶԼՄ-ներին», — ասել է Մամրաձեն:
Վրաստանի պատմության մեջ Մամրաաձեն երկու նման դեպք է հիշում, երբ դեսպանի նշանակումը հետաձգվել է կամ ընդհանրապես փոխվել: Առաջինը Էդուարդ Շևարդնաձեի նախագահության օրոք էր, մյուսը` Սահակաշվիլու: Սակայն փորձագետը մտահոգված է Հայաստանի և Վրաստանի միջև բանավոր համաձայնագրի հստակ խախտմամբ:
«Կամ խախտվել է բանավոր համաձայնությունը կամ հայկական կողմը որոշել է հետաձգել այդ թեկնածուի նշանակումը», — ասել է Մամրաձեն:
Նա համոզված է, որ երկու երկրների ԱԳՆ-ները չեն մեկնաբանի այդ հարցը` գործը չհասցնելով սկանդալի, քանի որ նույն անձը կարող է ապագայում նույն պաշտոնը զբաղեցնել այլ երկրում:
«Մենք ուզում էինք մի երկիր մեր մարդկանցից մեկին ուղարկել, բայց այդ երկրի դեսպանը մոտեցավ ինձ և խնդրեց փոխել նրա թեկնածությունը: Պատճառը մեր թեկնածուի կողմից այդ երկրի հասցեին ասված մի քանի սուր հրապարակումներն էին. արդյունքում, նա մեկ այլ երկրում դեսպան նշանակվեց», — ասել է Մամրաձեն:
Քաղաքագետ Սերգեյ Մինասյանը Կովկասի ինստիտուտի փոխտնօրենն է:
Այժմ Վրաստանում Հայաստանի դեսպանն է Յուրի Վարդանյան է, որը պաշտոնավարում է 2014 թ. օգոստոսից:
Վրաց-հայկական դիվանագիտական հարաբերությունները սկիզբ են առնում 1992 թ. հուլիսի 17-ից:
Ըստ Վրաստանի ազգային վիճակագրական ծառայության` Հայաստանը Վրաստանի ամենախոշոր առևտրային գործընկերների տասնյակի մեջ է:
2016 թվականին ապրանքաշրջանառությունը երկրների միջև գերազանցել է 367.4 մլն ԱՄՆ դոլարը: Անցյալ տարի Վրաստանը Հայաստան է արտահանել հիմնականում ավտոմեքենաներ, էթիլային սպիրտ, պարարտանյութեր, էլեկտրաէներգիա, բժշկական և կոսմետիկ ապրանքներ:
