ԵՐԵՎԱՆ, 19 սեպտեմբերի — Sputnik. Կարեն Դեմիրճյանի անվան մարզահամերգային համալիրում սեպտեմբերի 18-ին մեկնարկած Հայաստան-Սփյուռք համահայկական 6-րդ համաժողովի շրջանակում կազմակերպված կլոր սեղան-քննարկման ժամանակ Երևանի քաղաքապետ Տարոն Մարգարյանը նշել է, որ համաժողովը տեղի է ունենում Երևանի 2800-ամյակի նախաշեմին, որը ևս մեկ հնարավորություն է` քննարկելու հոբելյանական տարվա ծրագրերը, դրանց իրականացման ճանապարհները։ Այդ մասին տեղեկացնում է Երևանի քաղաքապետարանի պաշտոնական կայքը։
«2800-ամյա Երևանն ունի ձևավորված ավանդույթներ ու ազգային դիմագիծ։ Դրա հետ մեկտեղ ակնհայտ են ժամանակակից դինամիկ քաղաքին բնորոշ հատկանիշները։ Եվ գաղտնիք չէ, որ ցանկացած լուրջ և ծանրակշիռ քայլ, բացի գեղեցիկ գաղափարներից, պահանջում է նաև լուրջ ներդրումներ։ Ըստ այդմ, մեզ համար գերակա ուղղություններից է ներդրումների համար բարենպաստ միջավայրի ապահովումը և այդ տեսանկյունից Երևանի քաղաքապետարանը կարևորում է քաղաքային տնտեսության տարբեր ոլորտներում համայնք-մասնավոր հատված համագործակցությունն ու ընդլայնումը»,- ասել է Տարոն Մարգարյանը:
Քննարկման ավարտից հետո քաղաքապետն այցելել է Հայաստան-Սփյուռք 6-րդ համահայկական համաժողովի շրջանակում մարզահամերգային համալիրում բացված Երևանը ներկայացնող տաղավար և հետևել աշխատանքների ընթացքին։
