ԵՐԵՎԱՆ, 15 սեպտեմբերի — Sputnik. Բրիտանիայում ահաբեկչության սպառնալիքի մակարդակը շարունակում է բարձր մնալ, սակայն այն մշտապես վերլուծության է ենթարկվելու, առավոտյան Լոնդոնի մայրաքաղաքում տեղի ունեցած ահաբեկչությանը նվիրված Cobra կոմիտեի արտակարգ խորհրդակցության ժամանակ հայտնել է Մեծ Բրիտանիայի վարչապետ Թերեզա Մեյը, հայտնում է ՌԻԱ Նովոստին։
«Ահաբեկչական սպառնալիքների մակարդակը նույնն է, այն «լուրջ է», բայց մշտական վերլուծության է ենթարկվելու», – ասել է Մեյը։
Նա կոչ է արել բրիտանացիներին շատ զգոն լինել և հայտնել է, որ արտակարգ ծառայություններն անում են ամեն ինչ տեղի ունեցածի արագ բացահայտման համար։
Ահաբեկչությունը «վախկոտ հարձակում» որակելով` վարչապետն ընդգծել է, որ ահաբեկիչներին հաղթել չի հաջողվի։
Հիշեցնենք, որ պայթյունը տեղի է ունեցել Լոնդոնի «Պարսոնս Գրին» կայանում, պիկ ժամին։ Արդյունքում 19 մարդ է տուժել։ Պարսոնս գրինը ոչ այդքան հարուստ արվարձան է, որտեղ ապրում են մի շարք օտարերկրացիներ, ուսանողներ և ոչ հարուստ բրիտանացիներ։
Այս պայթյունը կես տարվա ընթացքում Մեծ Բրիտանիայում տեղի ունեցած արդեն հինգերորդ ահաբեկչությունն է։
Հունիսի 19-ի գիշերը, երբ մահմեդականները երեկոյան աղոթքից հետո դուրս էին եկել Լոնդոնի հյուսիսում գտնվող մզկիթից, մարդկանց վրաերթի էր ենթարկել բեռնատարը։ Մահացել էր 1 մարդ, 10-ը վիրավորվել էին։ Կանխամտածված սպանության մեջ կասկածվող 47-ամյա բրիտանացի Դարեն Օսբորնը ձերբակալվել էր։
Հունիսի 3-ի երեկոյան Լոնդոնյան կամրջի վրա ավտոմեքենան վրաերթ էր իրականացրել ամբոխի վրա, որից հետո երեք զինված ահաբեկիչներ, մեքենայից դուրս գալով, հարձակում էին գործել անցորդների վրա։ Ահաբեկիչներին չեզոքացրել էր ոստիկանությունը։ 7 մարդ էր զոհվել։
Մայիսի 22-ին Մանչեսթերում ահաբեկչություն էր տեղի ունեցել երգչուհի Արիանա Գրանդեի համերգի ժամանակ։ Պայթյունն իրականացրել էր մահապարտ Սալման Աբեդին։ Զոհվել էր 22 մարդ, այդ թվում` 12 երեխա։ Ահաբեկչության կատարման պատասխանատվությունը ստանձնել էր ԻՊ ահաբեկչական խմբավորումը, որն արգելված է Ռուսաստանում և մի շարք այլ երկրներում։
Մարտի 22-ի լոնդոնյան ահաբեկչությունը 5 մարդու կյանք էր խլել, տասնյակ մարդիկ վնասվածքներ էին ստացել։ Ահաբեկիչ Հալիդ Մասուդը մեքենան ուղղել էր հետիոտների վրա Վեսթմինսթերյան կամրջին, որից հետո խորհրդարանի շենքի մոտ մահացու վիրավորում էր հասցրել ոստիկանին։ Ահաբեկչին վնասազերծել էր Մեծ Բրիտանիայի պաշտպանության նախարարի զինված թիկնապահը։
