ԵՐԵՎԱՆ, 7 սեպտեմբերի — Sputnik. Աշխարհի 2017 թ. առաջնությանը Հայաստանին մասնակցել չթողնելն ընդամենն առաջարկ է, Sputnik Արմենիային ասաց Հայաստանի ծանրամարտի ֆեդերացիայի գլխավոր քարտուղար և ազգային հավաքականի գլխավոր մարզիչ Փաշիկ Ալավերդյանը։
«Դա ընդամենն առաջարկ է, որը պետք է քննարկվի սեպտեմբերի 30-ից հոկտեմբերի 1-ը Բուխարեստում կայանալիք IWF գործադիր խորհրդի արտահերթ նիստում: Հայաստանի ծանրամարտի ֆեդերացիան պաշտոնական գրություն չի ստացել»,- նշեց Ալավերդյանը։
Հավաքականի գլխավոր մարզիչը հայտնեց նաև, որ Հայաստանի ծանրամարտի ֆեդերացիան արդեն համապատասխան նամակ է պատրաստում միջազգային ֆեդերացիայի համար:
Նշենք, որ ըստ համացանցում տարածված տեղեկության` ինը երկրի, այդ թվում նաև Հայաստանին, արգելվելու է մասնակցել նոյեմբերին Անահայմում մեկնարկող ծանրամարտի աշխարհի առաջնությանը:
Ըստ Ալավերդյանի` ամենայն հավանականությամբ Աշխարհի առաջնության մասնակցությունից կզրկվեն Ռուսաստանի, Ղազախստանի և Չինաստանի ծանրամարտի հավաքականները, որոնց կազմում 2008թ և 2012թ օլիմպիական խաղերի ընթացքում խթանիչներ օգտագործելու պատճառով որակազրկվել են բազմաթիվ ծանրորդներ:
Հավելենք, որ սեպտեմբերի 30-ից հոկտեմբերի 1-ը Բուխարեստում կայանալիք IWF գործադիր խորհրդի արտահերթ նիստում, բացի վերը նշված երեք հավաքականներից, որակազրկման առաջարկ է լինելու ոչ միայն Հայաստանի, այլ նաև Բելառուսի, Ադրբեջանի, Մոլդովայի, Թուրքիայի և Ուկրաինայի հավաքականներին որակազրկելու համար:
