ԵՐԵՎԱՆ, 17 օգոստոսի – Sputnik. Հնարավոր է, որ իսրայելացի մասնագետներն են կառավարել ադրբեջանական անօդաչուներն Արցախում ապրիլյան պատերազմի ժամանակ, այսօր լրագրողներին ասաց «Մոդուս վիվենդի» վերլուծական կենտրոնի ղեկավար Արա Պապյանը։
«Մենք ենթադրում էինք, որ Իսրայելի քաղաքացիները մասնակցում էին քառօրյա պատերազմին։ Նույն Haaretz թերթը հայտնել է, որ ադրբեջանական ինքնաթիռներն Իսրայելից բերվել են ապրիլյան դեպքերից մի քանի օր առաջ։ Ակնհայտ է, որ մի քանի օրվա ընթացքում նրանք չէին կարող անօդաչու թռչող սարքերից օգտվել սովորել։ Այսինքն` այնտեղ մասնագետներ են եղել, ու հիմա դա հաստատվել է», – ասաց Պապյանը։
Նրա խոսքով` դա լուրջ միջադեպ է, որովհետև Իսրայելի քաղաքացիների մասնակցությունը ռազմական գործողություններին միջազգային իրավունքի ու հենց իսրայելական օրենսդրության խախտում է։
Եթե իսրայելցիների մասնակցությունն ապրիլյան դեպքերին հաստատվի, հայրենիքում նրանց պատասխանատվության կենթարկեն որպես վարձու զինվորների։
«Ինչպես է կարող մեր ԱԳՆ–ն օգտագործել այս փաստը` ես չգիտեմ», – ասաց Պապյանը։
Նա նշեց, որ Հայաստանը կարող էր նաև միջազգային քաղաքական ասպարեզում օգտվել Ադրբեջանի` Սիրիա զենքի տեղափոխելու իրավիճակից, սակայն հիմա այդ հարցն օրակարգից դուրս է։
