ԵՐԵՎԱՆ, 8 օգոստոսի – Sputnik. Արտաքին քաղաքականության մեջ թուրքական իշխանությունների սխալները հանգեցրել են նրան, որ երկիրը ռազմավարական մեկուսացման մեջ է հայտնվել, ասաց թուրքագետ Ռուբեն Սաֆրաստյանը։
Վերջին ամիսներին, Սաֆրաստյանի խոսքով, զգացվում է, որ Թուրքիայի ռազմավարական նշանակությունն ընկում է։ Անկարայի արտաքին քաղաքականությունը կորցնում է իր դինամիկան։
«Սա պայմանավորված է այն ռազմավարական նշանակության սխալներով, որ թույլ տվեց Էրդողանը»,– ասաց Սաֆրաստյանը։
Բեռլինի հետ հարաբերությունների վատթարացումն այդ սխալներից մեկն է, կարծում է փորձագետը։ Գերմանինան, մանավանդ Մերկելի օրոք, բազմաթիվ ազդեցության լծակներ ուներ Եվրոպայի այլ երկրների վրա Անկարայի հարցում։
Գերմանական ներդրումները թուրքական տնտեսության մեջ զգալիորեն նվազել են, կրճատվել է Գերմանիայից զբոսաշրջիկների հոսքը, զգացվում է, որ Բեռլինը դիմում է նաև ֆինանսական ճնշման այլ միջոցների, նշեց փորձագետը:
Եվս մեկ գործոն, որը բերում է Թուրքիայի ռազմավարական դիրքերի թուլացմանը. Սիրիայի ու Իրաքի վերաբերյալ քաղաքականության սխալ հաշվարկներն են:
«Մենք տեսնում ենք, որ այդ արկածախնդրությունը բացասական ազդեց Թուրքիայի վրա: Անկարան Բաշար ալ Ասադի գնալը դիտում էր որպես հիմնական նպատակներից մեկը, բայց մենք տեսնում ենք, որ նրա իշխանությունը ժամանակի ընթացքում ուժեղանում է»,- նշեց թուրքագետը:
Թուրքիայի փորձը՝ կանխել քրդական շարժման ակտիվացումը, նույնպես ձախողվեց: Ավելին՝ քրդական ձևավորումներն ավելի օրինական են դառնում ինչպես սիրիական իշխանությունների հետ հարաբերություններում, այնպես էլ ողջ աշխարհի: Իսկ հաշվի առնելով, որ սեպտեմբերի 25-ին Քրդստանի անկախության մասին հանրաքվե է անցկացվելու, կարելի է պնդել, որ տարածաշրջանում Թուրքիայի անցկացրած քաղաքականությունը հաջողության չի հասել:
Թուրքիայի դիրքերը թուլացել են ևս մի ուղղությամբ՝ արևմտյան դաշնակիցների, մասնավորապես, ԱՄՆ-ի հետ հարաբերությունների հարցում:
«Թուրքիան որոշակի պայմանավորվածություններ է ձեռք բերել Սիրիայի հարցով ՌԴ–ի ու Իրանի հետ: Ակնհայտ է, որ դա ԱՄՆ-ի դժգոհությունն է առաջացրել», — նշեց Սաֆրաստյանը:
Այդ ռազմավարական մեկուսացումից, նրա խոսքով, Թուրքիան փորձեց դուրս գալ նոր արկածախնդրության միջոցով՝ С-400 հրթիռային համակարգ գնելով, որը նրան, իրականում, հարկավոր չէր:
«Ժամանակը սխալ էր ընտրվել, քանի որ Ռուսաստանի հետ հարաբերությունների սրեցման պատճառով ամերիկացիներն արդեն լուրջ չեն ընդունում Թուրքիայի այդպիսի քայլերը: Դա ավելի կթուլացնի Թուրքիայի դիրքերը տարածաշրջանում ու ամբողջ աշխարհում»,- հայտնել է Սաֆրաստյանը:
