ԵՐԵՎԱՆ, 3 օգոստոսի — Sputnik. «Եվրատեսիլ» միջազգային մրցույթի և Եվրոպական հեռարձակողների միության պաշտոնական կայքերը մրցույթի կանոնների փոփոխության մասին տեղեկությունը չեն հայտնել սկանդալների պատճառով, որոնք մշտապես ուղեկցում են հեղինակավոր երաժշտական շոուն: Այդ մասին Sputnik Արմենիա-ի հետ զրույցում ասել է «Եվրատեսիլում» հայկական պատվիրակության ղեկավար, Հայաստանի հանրային հեռուստատեսության ներկայացուցիչ Գոհար Գասպարյանը:
Ավելի վաղ լրատվամիջոցներում նորություն էր հայտնվել, որ «Եվրատեսիլի» կազմակերպիչները փոխել են կանոնները Ուկրաինայի գործողությունների պատճառով, երբ չեն թույլատրել մասնակցել Ռուսաստանի ներկայացուցիչ Յուլիա Սամոյլովային երկրի մուտքի արգելքի պատճառով:
Փոփոխությունները վերաբերում են կանոնների որոշ կետերի: Այժմ ազգային հեռարձակողները չեն կարողանա ներառել պատվիրակության մեջ անձանց, որոնց համար սահմանափակված է մուտքը «Եվրատեսիլ» մրցույթն անցկացնող երկիր: Բացի դրանից, EBU-ն իրեն իրավունք է վերապահում մրցույթի հետաձգման դեպքում փոխանցել կազմակերպությունը մեկ այլ հեռարձակողի:
«Ամենայն հավանականությամբ՝ կանոնների փոփոխությունը տարածվել է այլընտրանքային ԶԼՄ-ների միջոցով, չնայած՝ դա ներքին տեղեկություն է, որը ենթակա չէ հրապարակման: Նմանատիպ փոփոխություններ տեղի են ունենում ամեն տարի, միտված են հստակեցնել նմանատիպ իրավիճակները, որպեսզի հետագայում շփոթմունք և խնդիրներ չլինեն երկրների և մասնակիցների միջև»,- նշել է Գասպարյանը:
Հարցին՝ չի բերելո՞ւ դա նրան, որ մի շարք երկրներ որոշում կկայացնեն չմասնակցել մրցույթին, նա նշեց, որ փոփոխությունները դժվար թե բերեն նման որոշումների:
«Եղել են և ուրիշ փոփոխություններ՝ կապված երգչի ընտրության, մրցույթը կազմակերպելու հետ: Այս տարի Ուկրաինան խախտել է մրցույթի անցկացման ժամանակացույցը, ինչը որոշ դժվարություններ է առաջացել»,- նշել է հայկական պատվիրակության ղեկավարը:
Խնդիրներ կարող են լինել այն երկրների մոտ, որոնք ուզում են ուշադրության կենտրոնում գտնվել և ընկնում են քաղաքական սկանդալների մեջ, ասել է Գասպարյանը:
