ԵՐԵՎԱՆ, 27 հուլիսի – Sputnik, Արմենուհի Մխոյան. Ավտոմեքենան, կորցնելով կառավարումը, բախվել էր Ախուրյանի բժշկական կենտրոնի լաբորատորիայի պատին, որտեղ վտանգավոր նյութեր կային: Բախման հետևանքով մեքենայում հրդեհ էր բռնկվել, շենքի պատը փլուզվել, կան «տուժածներ»: Բարեբախտաբար, այս անգամ սա իրական դեպք չէ, այլ ծրագրած վարժանք:
Այս ուսումնավարժանքն ԱՄՆ Կանզաս նահանգի ազգային գվարդիայի և Միացյալ Թագավորության 6-րդ գումարտակի փորձագետների կողմից ՀՀ Շիրակի մարզի 6 հրշեջ-փրկարարական ջոկատների համար անցկացվող առաջին օգնության, կենսապահովման հիմունքների և վտանգավոր նյութերի հետ աշխատանքի թեմաներով դասընթացների տրամաբանական շարունակությունն է:
Վարժանքի մասնակից հրշեջ-փրկարարներն, արագ սահմանազատելով տարածքը և սկսելով հրդեհաշիջման աշխատանքները, միաժամանակ վտանգավոր տարածքից դուրս բերեցին պայմանական տուժածներին, նրանց ցուցաբերեցին անհրաժեշտ բուժօգնություն և իրականացրեցին վարակազերծում:
Բարեխիղճ ու նվիրված ծառայության համար հրշեջ-փրկարարներին շնորհակալություն հայտնեց ՀՀ Շիրակի մարզպետ Արթուր Խաչատրյանը:
Բրիտանական դեսպանատան պաշտպանության հարցերով կցորդ, փոխգնդապետ Դեյվիդ Էթելը (նստավայրը` Թբիլիսի) ընդգծեց՝ Հայաստանում հաճախակի հյուր է և վստահ է, որ արտակարգ իրավիճակում հայտնվելու դեպքում իրեն արագ օգնության կհասնեն պրոֆեսիոնալ փրկարարներ:
ՀՀ ԱԻ նախարար Դ. Տոնոյանը, ամփոփելով դասընթացների և վարժանքի արդյունքները, նշեց՝ «Շատ բարձր եմ գնահատում համատեղ վարժանքը: Մեր փրկարարներն ապահովեցին միջազգային չափանիշներին համապատասխան բարձր մակարդակ, և այն փորձը, որ ձեռք է բերվել այս դասընթացների շնորհիվ, նրանք կփոխանցեն նաև իրենց գործընկերներին: Մենք շնորհակալ ենք ԱՄՆ և Մեծ Բրիտանիայի ԶՈՒ ներկայացուցիչներին՝ աջակցության և իրենց փորձը մեզ փոխանցելու համար: Ինչ վերաբերում է հրշեջ-փրկարարական ջոկատների տեխնիկայի արդիականացմանը, ապա մենք աշխատելու ենք կարճ ժամանակում թե՛ պետբյուջեի հատկացումների, թե՛ մեր միջազգային գործընկերների օգնությամբ ամբողջությամբ վերազինել դրանք»:
Օրվա ընթացքում Լի Թաֆանելին ԱԻ նախարարի ուղեկցությամբ այցելեց նաև «Թռչունյան տուն» կրթահամալիր-մանկատուն, որտեղ դասընթացներն անցկացնելու ընթացքում հանգրվանել էին ամերիկացի և բրիտանացի փորձագետները:
Կանզաս-Հայաստան պետական համագործակցության հիմքը դրվել է 2003 թվականին: Հիմնական նպատակը` արտակարգ իրավիճակներում ռազմական ու քաղաքացիական կառույցների համագործակցությանը միտված նախաձեռնություններին աջակցությունն է և արձագանքող ուժերի պատրաստվածության բարձրացումը: Երկարատև համագործակցության ընթացքում իրականացվել են տարբեր թեմաներով բազմաթիվ դասընթացներ և համատեղ ուսումնավարժություններ, ինչպես նաև ԱՄՆ կողմից տրամադրվել է զգալի տեխնիկական աջակցություն:
