«Ենթատեքստ» հաղորդաշարի հյուրը պատմել է գանձերը հանրությանը հասանելի դարձնելու կառավարության գործելաոճի և այն մասին, թե պատմամշակութային արժեք ներկայացնող իրերը երբ ու ինչ ճանապարհով են հայտնվում գանձարանի պահուստներում:
ՀՀ ֆինանսների նախարարության աշխատակազմի «Թանկարժեք մետաղների և թանկարժեք քարերի պետական գանձարան» գործակալությունը վերջին մեկ տարվա ընթացքում որդեգրել է բաց ու թափանցիկ գործելաոճ՝ հանրությանը մասնակից դարձնելով իր բոլոր նախաձեռնություններին:
Sputnik Արմենիայի «Ենթատեքստ» հաղորդաշարի հյուրն է գործակալության պետ Վահե Առաքելյանը։ Նրա խոսքով` գանձերի թանգարանային ցուցադրությունները կունենան փուլային բնույթ: Գանձարանի աջակցությամբ ՀՀ ֆինանսների նախարարությունում նախատեսվում է ստեղծել, այսպես կոչված, «Թանգարանային անկյուն», որտեղ պարբերաբար կցուցադրվեն գեղարվեստական բարձր արժեք ունեցող իրեր:
Հիշեցնենք նաև, որ 2016թ. հոկտեմբերի 26-ին ՀՀ ֆինանսների նախարարության «Թանկարժեք մետաղների և թանկարժեք քարերի պետական գանձարան» գործակալության և ՌԴ ֆինանսների նախարարությանը կից «Ռուսաստանի Դաշնության թանկարժեք մետաղների և թանկարժեք քարերի պետական ֆոնդի ձևավորման, թանկարժեք մետաղների և թանկարժեք քարերի պահպանման, բացթողնման և օգտագործման» դաշնային պետական հաստատության միջև ստորագրվել է համագործակցության վերաբերյալ Փոխըմբռնման հուշագիր, որի արդյունքում հնարավոր կլինի կազմակերպել նաև ցուցադրություններ Ռուսաստանի Դաշնությունում:
«Ենթատեքստ» հաղորդումը կարող եք ունկնդրել նաև Sputnik Արմենիա ռադիոկայանի եթերում (FM 106.0):
Հաղորդաշարի հեղինակը Լուսինե Մկրտչյանն է։
