ԵՐԵՎԱՆ, 23 հունիսի — Sputnik. Հայտնի է դարձել ԱՄՆ նախկին առաջին տիկին Ժակլին Քենեդու ժամացույցի գնորդը։ Ժամացույցը աճուրդի էր դրվել Christie's–ում։
Ժակլին Քենեդու ժամացույցը գնել է ռեալիթի–շոուի աստղ և գործարար Քիմ Քարդաշյանը։ Այս մասին հայտնում է TMZ–ն։ Պարբերականի տվյալով` Քարդաշյանը գաղտնի է մասնակցել աճուրդին, որի ժամանակ մեկ լոտով ներկայացվել են ԱՄՆ նախկին նախագահ Ջոն Քենեդու կնոջ ժամացույցն ու նկարը։
Լոտի սկզբնական արժեքը 120 հազար դոլար է եղել, սակայն Քիմ Քարդաշյանը Cartier ժամացույցը գնել է 379,5 հազար դոլարով։ Ժամացույցը 750 հարգի ոսկուց է, իսկ գործարանային գլխիկի վրա շափյուղա է տեղադրված։ Ժակլին Քենեդին այդ ժամացույցը նվեր էր ստացել արքայազն Ստանիսլավ Ռադզիվիլից։
