ԵՐԵՎԱՆ, 11 հունիսի — Sputnik. Եգիպտոսի իշխանությունները սկսում են կիրառել էլեկտրոնային համակարգի փորձնական տարբերակը, գրում է «Աշ-Շուրուկ» եգիպտական թերթը` հղում անելով Եգիպտոսի զբոսաշրջության նախարար Յախյա Ռաշիդին:
Նախարարն ասել է, որ էլեկտրոնային վիզաների համակարգը լիովին կգործի մոտ ժամանակներս: Նա նաև նշել է, որ ավարտվել է էլեկտրոնային վիզաների նախագծի մեկնարկին վերաբերող նախապատրաստական փուլը, այն համաձայնեցված է պրոֆիլային նախարարությունների հետ: Այդ համակարգը կօգնի դեպի Եգիպտոս մեծ քանակով զբոսաշրջիկներ ներգրավելու գործում:
Եգիպտոսը նախատեսում էր էլեկտրոնային վիզաների համակարգը գործարկել հունիսի 1-ից, սակայն հետաձգեց այդ քայլը տեխնիկական պատճառներով, գրում է ՌԻԱ Նովոստին:
Եգիպտոսի զբոսաշրջության նախարարի խոսքով` այս համակարգի շնորհիվ ցանկացած զբոսաշրջիկ աշխարհի ցանկացած կետում գտնվելով՝ հնարավորություն կունենա դիմում ներկայացնել երկիր մուտք գործելու նպատակով էլեկտրոնային վիզա ստանալու համար: Էլեկտրոնային վիզաները հնարավոր կլինի ստանալ և նախապես վճարումն իրականացնել առցանց համակարգի միջոցով, որը հեշտացնում է երկիր մուտք գործելու ու օդանավակայաններում անձնագրային ստուգումների գործընթացները:
Փորձագետները կարծում են, որ էլեկտրոնային վիզաների համակարգը կավելացնի զբոսաշրջիկների հոսքն այն երկրներից, որոնց քաղաքացիները Եգիպտոս մուտք գործելու համար վիզայի մասին նախապես պետք է հոգան, օրինակ, Չինաստանից, որի հետ եգիպտական զբոսաշրջային ոլորտը մեծ հույսեր է կապում:
