ԵՐԵՎԱՆ, 11 հունիսի — Sputnik. Ֆիլմի վառ կերպարները` Չաղը, Ցանցառը, Նիկուլինը, որոնց արձանները տեղադրված են Ամիրյան փողոցի ռեստորաններից մեկի մուտքի մոտ, ներկայացված են «սիրահարված ջիգիթի «բարեկամների»» կերպարում:
Կատակերգության սյուժեի համաձայն՝ դրվագներից մեկում այս հերոսները հայտնվում են ռեստորանում, որտեղ ճաշում է Շուրիկը՝ Կովկասյան ժողովուրդների ազգային հագուստ հիշեցնող հանդերձանքով, և խոստանում են «մորթել» Շուրիկին, եթե նա հրաժարվի մասնակցել «հին ավանդույթին` հարսնացու առևանգելու արարողությանը»:
Ճիշտ է, հետո «բարեկամներն» իրենց «բամբարբյա-կերգունդու» լեզվով թարգմանչի օգնությամբ բացատրեցին, որ դա կատակ է, սակայն բոլորս քաջատեղյակ ենք, որ ցանկացած «կատակի մեջ ճշմարտության նշույլ կա»: Այսօր առավոտյան ուշադիր անցորդները նկատեցին, որ եռյակի առաջնորդ Չաղին զինաթափել են:
Գոտուց կախված դաշույնից անհայտ անձինք թողել են միայն կոթը: Կարծես, Չաղն այլևս Շուրիկին սպառնալու զենք չունի և նրա վիրտուալ ճակատագրի համար կարելի է անհոգ լինել: Սակայն, իրականում, բավականին ցավալի է, որ երևանցիների և Երևանի հյուրերի սիրած արձանը գիշերային գինովցած ու ոչ ադեկվատ անցորդների (հավանաբար) մոտ արձանի կողքին ոչ թե լուսանկարվելու, այլ վնասելու ցանկություն է առաջացրել:
Պետք է նշել, որ ռեստորանի ադմինիստրատորը կատարվածի մասին իմացավ ռեստորանի կողքով անցնող մարդկանցից, որոնք անուշադրության չմատնեցին տուժած կինոհերոսին և անտարբեր չանցան նրա կողքով:
Русская версия
