ԵՐԵՎԱՆ, 2 հունիսի — Sputnik. ԼՂՀ տնտեսական ակտիվությունն այս տարվա առաջին եռամսյակում 7.8-ով գերազանցել է նախորդ տարվա նույն ցուցանիշը: ԼՂՀ վիճակագրական ծառայության հրապարակած տեղեկությունները Sputnik Արմենիայի հետ զրույցում հաստատեց Արցախի նախագահի խորհրդական Տիգրան Աբրահամյանը:
Պաշտոնական վիճակագրության համաձայն՝ Արցախի Հանրապետության այս տարվա առաջին եռամսյակի տնտեսական արտադրանքի կազմում 31.3%-ը բաժին է ընկել հանքարդյունաբերությանը, 24.5%-ը՝ մշակող արդյունաբերությանը, 42.8%՝ էլեկտրականության, գազի արտադրությանը:
Գյուղատնտեսության և ձկնորսության համախառն արտադրանքը կազմել է 5.1մլրդ դրամ,ինչը 2016թ.-ի հունվար-մարտի համեմատ նվազել է 15.1 տոկոսով:
Նախորդ տարվա նույն ժամանակահատվածի համեմատ 15.3 տոկոսով նվազել է նաև խոշոր եղջերավոր անասունների գլխաքանակը, իսկ տնային թռչունների գլխաքանակն աճել է 1.9 տոկոսով:
2017թ.-ի հունվար-մարտին հանրապետությունում իրականացվել է 8.4 մլրդ. դրամի շինարարություն, ինչը նախորդ տարվա համեմատությամբ 51.3 տոկոսով ավելի է:
2017թ. հունվար-մարտին ԼՂՀ-ում ամսական աշխատավարձը կազմել է 152.0 հազ. դրամ: Այն նախորդ տարվա համեմատ բարձրացել է 1.1 տոկոսով:
Արցախի նախագահի խորհրդական Տիգրան Աբրահամյանը մեզ հետ զրույցում նշեց, որ հաշվետու ժամանակահատվածում արտաքին առևտրաշրջանառության ծավալն աճել է 60.2 տոկոսով, արտահանումը՝ 70.6, ներմուծումը` 57.5 տոկոսով:
ՙԱրտաքին առևտրաշրջանառության ծավալը 2017թ.-ի հունվար-մարտին կազմել է 39.3 մլրդ դրամ, ինչը համարժեք է 80.8 մլն ԱՄՆ դոլարին, այդ թվում արտահանումը՝ 8.6 մլրդ դրամ, իսկ ներմուծումը՝ 30.7 մլրդ դրամ՚,- ասաց Աբրահամյանը:
2017թ.-ի հունվար-մարտին 3 տոկոսով աճել է նաև ԼՂՀ տարածքում բեռնափոխադրումների ծավալը, 6.7 տոկոսով՝ ուղևորափոխադրումներինը:
Իսկ ավտոմոբիլային տրանսպորտի ուղևորաշրջանառությունը նույն ժամանակահատվածում աճել է 22.8 տոկոսով:
