ԵՐԵՎԱՆ, 31 մայիսի — Sputnik. Ռուսաստանի հավաքականի նախկին հարձակվող Ռոման Պավլյուչենկոյի` մոսկովյան «Արարատ» տեղափոխվելու պատճառը ֆինանսական ակնկալիքները չէին։ Այս մասին ասել է ակումբի նախագահ Վալերի Հովհաննիսյանը «Սպորտ ՖՄ»-ի եթերում։
Ավելի վաղ Պավլյուչենկոն, որը հանդես էր գալիս «Ուրալի» կազմում, լքել է ակումբը ընտանեկան հանգամանքների պատճառով։
«Պավլյուչենկոյի համար առաջնահերթ խնդիր էր Մոսկվա վերադառնալը, այնպես որ նրան համոզելը բարդ չէր։ Նա իմացավ` ինչպես է զարգանալու նախագիծը, և մեր ակումբի հետ պայմանագիր ստորագրած առաջին խաղացողը դարձավ։ Պայմանագիրն ու ֆինանսական միջոցները նրա համար ամենևին էլ առաջնահերթ չէին», — ասել է Հովհաննիսյանը։
Նրա խոսքով` ակումբի նպատակն էռուսական ֆուտբոլում հասնել առավելագույնի։ Հովհաննիսյանը նշել է, որ Ռուսաստանում մեծ հայ համայնք կա, բայց այս խմբին պետք է երկրպագեն ոչ միայն հայերը։
«Մենք ինչ-որ աստղերի չենք կանչելու, մարտունակ լավ թիմ է լինելու։ Պոգրեբնյակն «Արարատու՞մ»։ Ոչ, ցավոք սրտի։ Պավլյուչենկոն մեզ բավարար է։ Ամենակարևորը Ռոմանի մարդկային հատկանիշներն են։ Նա ֆուտբոլ չի խաղում փողի համար», — ասաց Հովհաննիսյանը։
«Արարատ» թիմի խաղացողների մեծ մասը հայկական ծագում ունեցող ռուսաստանցի ֆուտբոլիստներ են։ Թիմն «Արարատ» է կոչվել` ի պատիվ համանուն ակումբի, որը հաղթել է 1973 թվականի ԽՍՀՄ առաջնությունը և արժանացել է Խորհրդային Միության գավաթին (1973 7 1975 թվականներին)։
