ԵՐԵՎԱՆ, 16 մայիսի — Sputnik. Հայաստանի և Արցախի 19 ուսանող կընդունվի ամբողջ աշխարհում գործող UWC միջազգային ցանցի հեղինակավոր դպրոցներ, Sputnik Արմենիային հայտնել են UWC Դիլիջանի մամուլի ծառայությունից։
UWC քոլեջի ապագա ուսանողները Հայաստանից և Արցախից մայիսի 19-ին կհավաքվեն Դիլիջանի դպրոցում։ 10 երեխա կսովորի Դիլիջանի UWC միջազգային դպրոցում, ևս 9-ը` Գերմանիայի, Չինաստանի, Բոսնիայի և Հերցեգովինայի, Հնդկաստանի, Իտալիայի, Նիդեռլանդների, Նորվեգիայի, Թաիլանդի և ԱՄՆ-ի դպրոցներում։
Բոլոր ուսանողները Scholae Mundi Armenia հիմնադրամի և առանձին բարերարների կողմից համապատասխան կրթաթոշակներ ստացան այդ դպրոցներում սովորելու համար։
Դիլիջանի դպրոցում նրանք կհանդիպեն դպրոցի տնօրեն Դենիզ Դևիդսոնի, Հայաստանի կրթության փոխնախարար Դավիթ Սահակյանի, ԵՄ պատվիրակության համագործակցության բաժնի ղեկավար Խոա-Բին Աճեմյանի հետ։ Ուսանողները հանդիպում կունենան նաև Համաշխարհային բանկի երևանյան ներկայացուցչության տնօրեն Լորա Բեյլիի, Scholae Mundi Armenia բարեգործական հիմնադրամի գլխավոր գործադիր տնօրեն Անդրեյ Խոջիկյանի և այդ հիմնադրամի և UWC Դիլիջան դպրոցի համահիմնադիր Վերոնիկա Զոնաբենդի հետ։
