ԵՐԵՎԱՆ, 30 ապրիլի — Sputnik. Օսկար Այզեքին որդի է պարգևել ռեժիսոր-վավերագրագետ Էլվիրա Լինդան: Այս մասին հայտնում է hellomagazine-ը:
Զույգը որոշել էր այս լուրն աշխարհին հայտնել Tribeca կինոփառատոնի ժամանակ: Էլվիրա Լինդը պետք է բեմ բարձրանար՝ իր ռեժիսորական աշխատանքի համար մրցանակ ստանալու, սակայն նա չի կարողացել մասնակցել արարողությանը: Փոխարենը ցուցադրվել է նրա նկարահանած տեսանյութը, որում Լինդան արդեն նորածին որդու հետ է:
«Եթե հիմա ես կարողանայի պարել, կպարեի: Կթռչկոտեի: Եվ այդպես մեկ շաբաթ շարունակ», — էկրանից ասել է երիտասարդ մայրիկը:
Օսկար Այզեքի և Էլվիրա Լինդի սիրավեպը սկսվել է 2012 թվականին, սակայն նրանք իրենց հարաբերությունները հաստատել են 2016 թվականին «Ոսկե գլոբուս» մրցանակաբաշխության ժամանակ: Դերասանն անձնական կյանքի մասին խոսել չի սիրում: Հայտնի է միայն, որ ավելի վաղ նա նշանված է եղել Մարիա Միրանդայի հետ, որին սիրել է մանկուց: Սակայն ավելի ուշ զույգը բաժանվել է:
