ԵՐԵՎԱՆ, 30 մարտի — Sputnik. Մարտի 29-ին Լեհաստանի հայ համայնքի կազմավորման 650 ամյակի առիթով անցկացվող միջոցառմանը Լեհաստանի նախագահ Դուդան, ելույթ ունենալիս, հայերին անվանեց առաջին լեհ մտավորականներ, հայտնում է Լեհական Ռադիոն։
Ինչպես նշեց լեհ առաջնորդը, հայ համայնքը Լեհաստանում սկսել է ձևավորվել XIV դարի երկրորդ կեսին, երբ Լեհաստանի թագավոր Կազիմիր Ահեղը հայերին արտոնություններ տվեց և թույլ տվեց հիմնել առաջին հայկական թեմը։
«Հայերի ներդրումը լեհական պետականության կայացման հարցում դժվար է գերագնահատել, քանի որ այն վերաբերում է հասարակական կյանքի գրեթե բոլոր ոլորտներին. հայերը հիանալի ֆերմերներ էին և լեհական մտավորականության շերտի հիմնադիրները, հիանալի արհեստավորներ, առևտրականներ և այլն», — ասել է Դուդան։
Նշենք, որ Լեհաստանում ապրող հայերի մեծամասնությունը հետխորհրդային փախստականների ժառանգներն են, այլ ոչ թե հին հայկական համայնքի։ ԽՍՀՄ փլուզումից հետո մի շարք հայեր, բարեկեցիկ կյանք փնտրելով, մեկնեցին Լեհաստան։ 2015 թվականին Վրոցլավ քաղաքի հրապարակներից մեկը ստացավ «Հայկական» անվանումը։
