ԵՐԵՎԱՆ, 24 մարտի — Sputnik. ՀՀ նախագահ Սերժ Սարգսյանը կարծում է, որ ռուսաստանցի զբոսաշրջիկների հոսքը կաճի սահմանը հատելու ռեժիմը դյուրացնելուց հետո։
«Ազատ տեղաշարժը նշանակում է, որ խոչընդոտները պետք է քիչ լինեն։ Ինչի՞ համար են պետք հավելյալ դժվարությունները։ Բայց հարցը նույնիսկ դա չէ։ Հայաստանին է ձեռնտու։ Որովհետև շատ ավելի մեծ թվով զբոսաշրջիկներ կլինեն, որոնք կուզեն առանց դժվարությունների Հայաստան գալ։ Սա ոչ միայն զբոսաշրջությանն ու տնտեսությանն է վերաբերում, այլև` մարդկանց շփմանը։ Մենք պետք է աշխատենք բարեկամության և համագործակցության ուղղությամբ, լավագույն աշխատանքը մարդկանց շփումն է»,- ասել է Սարգսյանը «Միր» հեռուստաընկերությանը տված հարցազրույցում։
ՀՀ նախագահը նշել է, որ հիմա զբոսաշրջիկներին սպասարկող տարբեր հաստատություններում մեծ է ռուսերեն իմացող մասնագետների պահանջարկը։
«Կար ժամանակ, որ հյուրանոցներում ու ռեստորաններում աշխատում էին հիմնականում անգլերենի իմացությամբ մարդիկ, իսկ այսօր փնտրում են ռուսերեն լավ իմացող մարդկանց։ Որովհետև պահանջարկ կա։ Երկար ժամանակ է պահանջվել դրան հասնելու համար, և մենք հասել ենք դրան, ինչը շատ լավ իրողություն է»,- ասել է Սարգսյանը։
Նա հույս է հայտնել, որ ժամանակի ընթացքում Հայաստան այցելող ռուսաստանցիների թիվը հարյուր հազարների կհասնի։
ՀՀ քաղաքացիական ավիացիայի գլխավոր վարչության մամուլի ծառայության տվյալների համաձայն` ներքին անձնագրով մեկ ամսվա ընթացքում ՌԴ-ից մեր երկիր է ժամանել 3091 քաղաքացի։
