ԵՐԵՎԱՆ, 10 մարտի — Sputnik, Արմենուհի Մխոյան. ՀՀ վարչապետ Կարեն Կարապետյանը խոստացել էր, որ Գյումրիում զարգանալու է զբոսաշրջությունը։ Առաջին քայլն արված է. Կարեն Կարապետյանի` Գյումրու զարգացման համար ստեղծված հատուկ հիմնադրամին փոխանցած գումարով գնվել է Գյումրիում գտնվող երկհարկանի կառույցներից մեկը:
Գյումրու գլխավոր ճարտարապետ Հենրիկ Գասպարյանը Sputnik Արմենիային հաստատեց, որ շինության տարածքն արդեն մաքրվում է` աշխատանքներ իրականացնելու համար։
«Չեմ կարող ասել, թե ինչքան գումար է վճարվել դրա համար: Այս պահին արդեն կառույցում մաքրման աշխատանքներ են իրականացվում»,- նշեց Հենրիկ Գասպարյանը՝ փաստելով, որ հենց այդ շինությունն է ՀՀ վարչապետի ներդրումով գնված կառույցը:
Նշենք, որ այդ տարածքում քառակուսի մետրի արժեքը` կապված կառույցի վիճակից ու գտնվելու վայրից, տարբեր է՝ 25 հազարից մինչև 200 հազար դրամ:
