ԵՐԵՎԱՆ, 15 փետրվարի — Sputnik. Եկեղեցական խորհրդի նախագահ Տ. Սահակ եպիսկոպոս Մաշալյանն օրեր առաջ հայտարարել էր, որ հրաժարվում է Թուրքիայում Պոլսո Հայոց պատրիարքի ընտրությունների մասնակցությունից` մեղադրանքներ ներկայացնելով «Հովակիմ 1461» հիմնադրամին և փոխպատրիարք Արամ Աթեշյանին։ «Ակոս» թերթի հայկական տարբերակի խմբագիր Բագրատ Էստուկյանի խոսքով` Մաշալյանի ներկայացրած մեղադրանքները նորություններ չեն։
Տ. Սահակ եպիսկոպոս Մաշալյանը մեղադրել է պատրիարքարանի ֆինանսական հարցերով զբաղվող «Հովակիմ 1461» հիմնադրամին` ասելով, որ դրանից կոյուղու հոտ է գալիս, բայց եպիսկոպոս Մաշալյանը հենց այդ հիմնադրամի երկրորդ նախագահն է (հիմնական նախագահը Արամ եպիսկոպոսն է):
Մաշալյանն ընտրությունների մասնակցությունից հրաժարվելու և Ստամբուլը լքելու իր որոշման համար մեղադրել է փոխպատրիարք Արամ Աթեշյանին և հայտարարել, որ նա ամեն կերպ խոչընդոտում է նախընտրական գործընթացն ու խախտում եկեղեցական կարգը:
«Շատ ծանր խոսքեր է ասել համայնքների հաստատությունների ներկայացուցիչների հասցեին։ Որոշ շրջանակներ Մաշալյանին հերոսացրել են այդ հայտարարության համար։ Մենք համակարծիք ենք այդ մեղադրանքներին, բայց մենք տարիներ ի վեր ենք այդ ամենի մասին խոսում, բայց նա ոչ մի անգամ չի արձագանքել մեր ասածներին»,- ասաց Էստուկյանը։
Նրա խոսքով` հիմա հանկարծ պարզվել է, որ այդ հիմնադրամը սխալ ուղղությամբ է գնում, իսկ ինքն էլ չի ուզում մեղսակից դառնալ։
Ըստ Էստուկյանի` Պոլսո Հայոց պատրիարքի ընտրությունների գործընթացում պայքարի միջավայր չկա։
«Պետք է պայքարի դաշտը ձևավորվի, որպեսզի մարդիկ ասեն` եթե ես ընտրվեմ, ավելի լավ բաներ կխոստանամ, բայց այդ դաշտը չկա»,- ասաց Էստուկյանը։
Նա նշեց, որ պատրիարքի ընտրությունների օրն առայժմ անորոշ է, ենթադրվում էր, որ Զատկի տոնից հետո կանցկացվի, բայց առայժմ որևէ հստակություն չկա։
Պոլսահայ համայնքում շարունակվում է քննարկվել Պոլսո Հայոց Պատրիարքարանի Կրոնական ժողովի ատենապետ տեր Սահակ եպիսկոպոս Մաշալյանի հրաժարականը և դրան հաջորդած պոռթկումը։
Սահակ Սրբազանը ոչ միայն հրաժարական է տվել Կրոնական ժողովի ատենապետի, այլև՝ պատրիարքարանին կից գործող «Հովակիմ 1461» հիմնարկի փոխատենապետի պաշտոնից:
Սահակ Մաշալյանը նամակ է հրապարակել, որում նշել է. «Ակնհայտ է, որ քանի դեռ Արամ սրբազանը Պոլսո պատրիարքական փոխանորդի պաշտոնում է, պատրիարքական ընտրությունները չեն կարող կայանալ: Իր լիազորություններն օգտագործելով ութ տարի մանիպուլյացիա իրականացնելը, սեփական պաշտոնը չարաշահելը հանցավոր բնույթ ունեն, և համաձայն եկեղեցական օրենքների նա արժանի է պատժի»,-համայնքային մամուլին ուղարկած իր նամակում նշել է Սահակ եպս. Մաշալյանը` ավելացնելով, որ պատմության մեջ երբեք պատրիարքի աթոռը ութ տարի թափուր չի մնացել:
Նշենք, որ Պոլսո Հայոց պատրիարք Մեսրոպ Մութաֆյանը կոմայի մեջ է գտնվում 2008թ.-ից և փաստացի չի գործում որպես պատրիարք: Նրա փոխարեն այդ լիազորությունները կատարում է արքեպիսկոպոս Արամ Աթեշյանը, որն ընտրված է ոչ թե համայնքի, այլ պետության կողմից:
