ԵՐԵՎԱՆ, 15 փետրվարի — Sputnik. Լաթաքիայում սկսվել է Հայաստանից ուղարկած մարդասիրական օգնության բաշխումը։ Առաջիններից մեկը օգնությունը ստացել է Լաթաքիայի եկեղեցուն կից գործող դպրոցը, որտեղ ուսանում է 400 հայ երեխա։ ՌԻԱ Նովոստիի տեղեկացմամբ՝ այդ մասին լրագրողներին հայտնել է Սիրիայում պատերազմող կողմերին հաշտեցնելու ռուսական կենտրոնի ներկայացուցիչ Վիտալի Իլկովը։
«Մարդասիրական ակցիայի շրջանակներում Սիրիայի ժողովրդին Հայաստանը օգնություն է ուղարկել։ Օգնությունը բաժանվելու է Լաթաքիայում և Հալեպում»,- ասել է նա։
Հայաստանից մարդասիրական օգնության առաջին խմբաքանակը՝ 18.5 տոննա, Հմեյմիմ օդանավակայան է հասցրել Ռուսաստանի ավիացիայի ռազմատրանսպորտային ինքնաթիռը։ Որպես օգնություն ուղարկվել է 20 տեսակ պարենամթերք, այդ թվում` հյութ, պահածոյացված բանջարեղեն, մուրաբա, միս։ Բեռի երկրորդ խմբաքանակը` տաք հագուստ, Հմեյմիմ կուղարկվի մոտ օրերս։
«Սիրիայում պատերազմող կողմերին հաշտեցնելու ռուսական կենտրոնի հետ համատեղ մենք ակցիա ենք անցկացնում։ Բեռն ուղարկվել է ռուսական զինվորականների օգնությամբ, և ցանկանում եմ խորին շնորհակալություն հայտնել ռուսական կողմին»,- նշել է Հալեպում Հայաստանի գլխավոր հյուպատոս Տիգրան Գևորգյանը, որը Լաթաքիա է ժամանել բեռը դիմավորելու համար։
Նա ընդգծել է, որ պարենամթերքն ու հագուստը կբաշխվեն Սիրիայի ամբողջ ժողովրդի միջև՝ անկախ ազգային և կրոնական պատկանելությունից։
«Անձամբ եղել եմ ռազմական իրադարձությունների էպիկենտրոնում։ Հայաստանի և ամբողջ աշխարհի համար կարևոր է օգնել ռազմական գործողությունների կիզակետում հայտնված մարդկանց»,- նշել է Գևորգյանը` հիշեցնելով, որ ավելի վաղ, այդ թվում՝ 1988 թվականի ավերիչ երկրաշարժից հետո, սիրիական կողմը օգնել է Հայաստանին դիզվառելիքով և ցորենով։
«Մենք շատ լավ ենք հիշում դա և փորձում ենք շնորհակալություն հայտնել սիրիացի ընկերներին»,- ասել է գլխավոր հյուպատոսը։- «Այս ակցիայով մենք ցանկանում ենք կոչ անել երկրներին՝ հետևել մեր օրինակին և ոչ միայն բարեգործական օգնություն տրամադրել, այլև ուշադրություն դարձնել Սիրիայի ժողովրդին, տիրող վիճակին, սիրիական խնդրի կարգավորմանը»։
