Թբիլիսիի հին թաղամասերից մեկում գտնվող XIX դարի հայկական Շամխորեցոց Սուրբ Աստվածածին (Կարմիր Ավետարան) եկեղեցու մոտակայքում սկսվել է բնակելի տան կառուցումը, ինչը դժգոհություն է առաջացրել վրացահայերի և Վրաստանի մշակութային արժեքներով հետաքրքրված կազմակերպությունների մոտ։
Հայ առաքելական եկեղեցու Վիրահայոց թեմի մամուլի քարտուղար Սուսաննա Խաչատրյանը հայտնեց, որ առաջինը տան շինարարության մասին ահազանգել են «Tiflis Hamkari» կազմակերպության ներկայացուցիչները։ Վրաստանի մշակույթի և հուշարձանների պահպանության նախարարությունը նրանց պատասխանել է, որ տան կառուցումը ոչինչով եկեղեցուն չի սպառնում։
Հայ առաքելական եկեղեցու վիրահայոց թեմը գրավոր դիմել է բոլոր ատյաններին, այդ թվում՝ Թբիլիսիի քաղաքապետարան և Վրաստանի մշակույթի և հուշարձանների պահպանության նախարարություն, սակայն պատասխան դեռ չի ստացել։
Վրացահայերի հետագա անելիքը կախված կլինի համապատասխան ատյաններից ստացված պատասխաններից։
