ԵՐԵՎԱՆ, 9 փետրվարի-Sputnik. Ֆինանսների նախարար Վարդան Արամյանը ականջալուր է վարչապետի հանձնարարականներին։ Կառավարության նիստի ժամանակ նա վերահաստատեց, որ պետք է ամեն ինչ անել տնտեսվարողների նկատմամբ ձևական բնույթի պահանջները վերացնելու համար։
«Եթե տնտեսվարող սուբյեկտն այս կամ այն կերպ առնչվում է պետական մարմինների հետ, ու կան պահանջներ, որոնք ձևական են, անհարկի միջամտություն է առաջանում։ Բերեմ օրինակ` գործող կարգով մենք պահանջում ենք, որ տնտեսվարող սուբյեկտն իր գնային առաջարկի հետ միասին ներկայացնի նաև շահույթի և ինքնարժեքի մասին կանխատեսում։ Իրականում դա խոչընդոտ է խոշոր տնտեսվարողների համար»,-ասաց նախարարը։
Հաջորդ փոփոխությունը վերաբերում է էլեկտրոնային համակարգի ընդլայնմանը։
Ֆինանսների նախարարը փոփոխությունների շարքում հատուկ շեշտեց` հանվում է 15 տոկոս գնային նախապատվությունը, որ տրվում է ԵԱՏՄ ծագման ապրանքներին։
«Ճիշտ կլինի, որ մենք մեր քիչ միջոցները նպատակային օգտագործենք այլ գործիքակազմի միջոցով։ Գնային նախապատվությունը հանելը ճիշտ է մի քանի պատճառով։ Ամբողջ աշխարհի փորձը փաստում է, որ գնային նախապատվություն տալը ճիշտ գործիք չէ տեղական արտադրանքը խթանելու համար»,-ասաց Արամյանը։
Միաժամանակ նա նշեց, որ պետք հաշվի առնենք, որ մենք ԵԱՏՄ անդամ երկիր ենք, և մեր երկրի պարտավորություններն այնպիսին են, որ չենք կարող բացառապես նախընտրություն տալ տեղական արտադրողին։
Հարկ է հիշեցնել, որ ԵԱՏՄ պայմանագրաիրավական դաշտը պահանջում է, որ միության անդամները պետական գնումներում միմյանց հանդեպ խտրականություն չդրսևորեն։
Ավելի վաղ ֆինանսների նախարար Վարդան Արամյանը օրինակով բացատրել էր` ենթադրենք ես 15 տոկոսով ավելի ղազախական արտադրության ապրանքներ եմ գնում: Հարց է առաջանում, թե ինչի համար պետք է դա անեմ, եթե կարելի է նույն որակի եվրոպական ապրանք գնել, որը ավելի էժան կլինի և կբավարարի իմ պահանջները։
