ԵՐԵՎԱՆ, 3 փետրվարի — Sputnik. Այսօր Թբիլիսիի Black and White պատկերասրահում կբացվի հայտնի հայ լուսանկարիչ և ֆոտոլրագրող Գերման Ավագյանի «Թբիլիսիի դեմքերը» ցուցահանդեսը, հաղորդում է Sputnik Գրուզիան։
«Թբիլիսիի դեմքերը» ֆոտոնախագծում ներկայացված են Վրաստանի բնակիչների սև-սպիտակ դիմանկարները. վրացիներ, հայեր, ադրբեջանցիներ, թուրքեր, ռուսներ, ուկրաինացիներ, լեհեր, հույներ, հրեաներ և այլ ազգերի ներկայացուցիչներ։ Լուսանկարչի խոսքով` այդ նախագծի արժեքը Թբիլիսիում բնակվող տարբեր ազգությունների և մշակույթների ներկայացուցիչների հետ շփման եզակի հնարավորության մեջ է։
«Այսօր Թբիլիսին Կովկասի միակ քաղաքն է, որտեղ տարբեր ազգերի ներկայացուցիչներ կարող են ներդաշնակ ապրել կողք կողքի, հետևել կրոնական ծեսերին, նշել տոները, պահպանել իրենց ազգային ավանդույթները»,- գրել է Գերման Ավագյանը՝ Facebook սոցցանցի իր էջում։
«Թբիլիսիի դեմքերը» նախագիծն արժեքավոր է ոչ թե վերջնական արդյունքով, այլ աշխատանքային գործընթացով և նկարահանումների ընթացքում մարդկանց հետ շփվելու հնարավորությամբ։
«Ինձ համար` որպես Հայաստանում ապրող և աշխատող լուսանկարչի, ավելի հետաքրքիր էր նախագծի իրագործման գործընթացը, քան դրա արդյունքը։ Այդ նախագիծն ինձ հնարավորություն է տվել շփվել մարդկանց հետ, որից ես զրկված եմ Կովկասում էթնիկ հակամարտությունների պատճառով»,- ասում է Ավագյանը։
Ցուցահանդեսը կտևի երեք օր։ Մուտքն ազատ է։
Գերման Ավագյանը ծնվել է 1962թ-ին Վրաստանի Ցուլուկիձեի քաղաքում, այժմ` Խոնի։ 1980-1985թթ-ին սովորել է Երևանի պոլիտեխնիկական ինստիտուտի էներգետիկ ֆակուլտետում։ 1999թ-ին Գերման Ավագյանը ֆոտոլրագրության սեմինար է անցել «Մագնումում», որը կազմակերպել է Բաց հասարակության ինստիտուտը լուսանկարիչներ Լերի Թաուելի և Սյուզեն Մայսալեսի մասնակցությամբ։
