ԵՐԵՎԱՆ, 2 փետրվարի — Sputnik. Այսօր, Եվրոպական Խորհրդարանի լիագումար նիստում քվեարկությամբ հավանության է արժանացել Վրաստանի քաղաքացիների համար Շենգենյան տարածքում ազատ վիզային ռեժիմ սահմանելու հարցը:
553 պատգամավոր կողմ է քվեարկել, 66-ը` դեմ, 28-ը` ձեռնպահ. ձայների նման հարաբերակցությամբ հաստատվել է Վրաստանին վիզայի ազատականացում տրամադրելու օրինագիծը:
Տեխնիկական գործընթացներից հետո հարևան երկրի քաղաքացիները կարող են առանց վիզայի այցելել ԵՄ անդամ երկրներ:
Հունվարի 12-ին Եվրախորհրդարանի Քաղաքացիական ազատությունների, արդարադատության և ներքին գործերի հանձնաժողովը (LIBE) կողմ էր քվեարկել Վրաստանի քաղաքացիների համար առանց վիզայի ԵՄ մուտքի իրավունքի տրամադրմանը։
Քվեարկությանը մասնակցած 45 պատգամավորներից 42-ը կողմ էր քվեարկել, 2-ը՝ դեմ, 1-ը` ձեռնպահ: 2016թ․ դեկտեմբերի 13-ին Եվրամիության մշտական ներկայացուցիչների հանձնաժողովը (COREPER) հաստատել է Վրաստանին վիզայի ազատականացում շնորհելու վերաբերյալ Եվրամիության խորհրդի կողմից Եվրախորհրդարանի հետ ստորագրված համաձայնագիրը։
