ԵՐԵՎԱՆ, 2 փետրվարի — Sputnik. Անգլիական «Լիվերպուլի» գլխավոր մարզիչ Յուրգեն Կլոպը նշել է, որ համաձայն չէ «Մանչեսթեր Յունայթեդի» գլխավոր մարզիչ Ժոզե Մոուրինյուի հետ, որը հայտարարել էր, որ մրցավարները մարզիչների նկատմամբ տարբերակված մոտեցում են ցուցաբերում և շեշտել էր նրա անունը: Այդ մասին տեղեկացնում է armsport.am-ը՝ հղում անելով BBC-ին։
«Ես գաղափար չունեմ, թե ինչու էր Մոուրինյուն խոսում իմ մասին: Ֆուտբոլը էմոցիոնալ խաղ է, այդ պատճառով նման իրավիճակներից խուսափելն անհնար է: Միայն ես չեմ այսպիսին: Այդպիսին են նաև Մոուրինյուն, Վենգերը և մյուսները: Երբեմն մենք ստանում տուգանք, երբեմն՝ ոչ»,- Կլոպի խոսքն է փոխանցել BBC-ն:
Հիշեցնենք, որ անգլիական «Մանչեսթեր Յունայթեդի» գլխավոր մարզիչ Ժոզե Մոուրինյուն «Հալ Սիթիի» հետ ոչ-ոքի խաղալուց հետո դժգոհել է, որ իր համար գործում են այլ օրենքներ:
«Օրեր առաջ «Լիվերպուլի» գլխավոր մարզիչ Յուրգեն Կլոպը բղավել էր չորրորդ մրցավարի վրա, սակայն հետո ներողություն խնդրել, ինչին վերջինս պատասխանել էր, որ ամեն ինչ կարգին է: Իսկ ինձ այսօր ասվեց. «Նստիր տեղդ, կամ քեզ կուղարկեմ տրիբունաներ»»,- ասել է Մոուրինյուն:
