ԵՐԵՎԱՆ, 31 հունվարի — Sputnik. ՀՀ ԱԳՆ Էդվարդ Նալբանդյանը, այսօր լրագրողների հետ հանդիպման ժամանակ, խոսել է Հայաստանի և Եվրոպական Միության նոր իրավական փաստաթղթի շուրջ բանակցությունների մասին։
«Եվրոպական Միության հետ մենք մեկնարկել ենք նոր իրավական փաստաթղթի շուրջ բանակցություններ, մինչ այսօր կայացել է բանակցությունների 9 փուլ: Հաջորդ փուլը նախատեսվում է փետրվարին: Կարծում եմ, որ մենք մոտենում ենք եզրափակիչ փուլին», — լրագրողներին ասաց Նալբանդյանը։
Նա նշեց, որ փաստաթղթի մեջ ներառված թե՛ քաղաքական, թե՛ տնտեսական դրույթների ճնշող մեծամասնությունը գրեթե համաձայնեցված է։
«Մոտակա օրերին Հայաստան կժամանի Եվրոպական Միության ընդլայնված պատվիրակությունը, որի կազմում կլինեն նաև ՀՀ-¬ի հետ նոր իրավական փաստաթղթի շուրջ բանակցողները», — ավելացրեց նախարարը։
Եվրամիության խորհուրդը 2015թ-ի հոկտեմբերի 12-ին Լյուքսեմբուրգում արտաքին գործերի նախարարների մակարդակով տեղի ունեցած նիստի ընթացքում լիազորել է Եվրահանձնաժողովին բանակցություններ սկսել Հայաստանի հետ` նոր համապարփակ համաձայնագրի մասին, որը կփոխարինի հանրապետության և ԵՄ-ի միջև գործընկերության և համագործակցության մասին գործող համաձայնագրին։
