ԵՐԵՎԱՆ, 16 դեկտեմբերի — Sputnik. Սնանկության կառավարիչ աշխատել ցանկացողների թիվը տարեցտարի ավելանում է, ինչը նշանակում է, որ այս մասնագիտության պահանջարկը Հայաստանում մեծ է:
«Սնանկության գործընթացներն ու դատական վարույթներն այսօր բավականին շատ են»,- Sputnik Արմենիայի հետ զրույցում ասաց Արդարադատության փոխնախարար Արթուր Հովհաննիսյանը: Իսկ թե ինչով է դա պայմանավորված փոխնախարարը դժվարացավ հստակ նշել՝ եզրակացնելով, որ այս հարցում դեր ունի նաև բնակչության իրավագիտակցության բարձրացումը, քանի որ մարդիկ գիտակցում են, որ «միակ ճիշտ լուծումը դատական գործընթացն է»։
Հարցին, թե արդյո՞ք, սնանկության վարույթների թվաքանակի ավելացումը չի վկայում, որ տնտեսվարողներն, իրենց ընկերությունները դիտավորյալ սնանկացնելով, փորձում են ազատվել ֆինանսական պարտավորություններից, հարկերից, տուրքերից, վարկերից, Արթուր Հովհանիսյանը պատասխանեց.
«Նման գործընթացը քրեորեն պատժելի արարք է: Սնանկության կառավարչի պաշտոնի առանձնահատկությունը նաև նրանում է, որ, պրոցեսին մասնակցելով, հասկանա՝ արդյո՞ք կազմակերպությունն օբյեկտիվորեն սնանկ է, թե ինչ-որ սուբյեկտիվ գործոններ կան և ինչ-որ շահագրգիռ անձինք, որ ուզում են, որ կազմակերպությունը համարվի սնանկ»:
Նման կասկածների ու փաստերի առկայության դեպքում սնանկության կառավարիչը պետք է դրանց մասին հայտնի իրավապահ մարմիններին: Սնանկության կառավարիչը պետք է նաև հասկանա՝ հնարավոր է արդյոք փրկել ընկերությունը սնանկացումից, թե՞ ոչ:
Սնանկության կառավարիչների թեկնածուների որակավորման ստուգումներն անց են կացվում տարին մեկ անգամ: Այս տարի որակավորման քննություններին մասնակցելու հայտ է ներկայացրել 53 անձ, ինչը ավելի քան 1 տասնյակով գերազանցում է նախորդ տարվա ցուցանիշը:
Որպեսզի անձը սնանկության կառավարչի գործունեություն իրականացնելու իրավունք ստանա, պետք է համապատասխան որակավորման քննություն հանձնի: Նման քննություններն անց են կացվում տարին մեկ անգամ: Քննությունը բարեհաջող հանձնելուց հետո հայտատուն ստանում է սնանկության կառավարչի անժամկետ վկայական:
