ԵՐԵՎԱՆ, 13 դեկտեմբերի — Sputnik. Կառավարության ներկայացրած նոր նախագծով առաջարկվում է 1000 դրամի պարտադիր վճարումը դիտարկել ոչ թե իբրև նոր հարկատեսակ, այլ դրոշմանիշային վճար: Փաթեթի մաս կազմող այլ օրենսդրական առաջարկներով էլ գործադիրն առաջարկում է բացառիկ արտոնություններ սահմանել ստեղծվող նոր հիմնադրամի համար: Մասնավորապես` հիմնադրամն ազատել ցանկացած տեսակի հարկերից ու տուրքերից և ապահովագրել սնանկացման հնարավոր գործընթացից:
Կառավարության այս առաջարկները տնտեսագիտական տեսանկյունից գնահատելով` ԱԺ ՀԱԿ խմբակցության պատգամավոր Հրանտ Բագրատյանը նշեց, որ սրանով կառավարությունն, ըստ էության, նոր հարկատեսակ է ներմուծում, բայց դրա անունն այլ բան է դնում:
Իսկ ինչ վերաբերում է հիմնադրամին, ընդդիմադիր պատգամավորի համոզմամբ, «կառավարությունը ստեղծում է ամենասովորական ներդրումային հիմնադրամը, որը, սակայն, չի ենթարկվելու հիմնադրամների մասին գործող օրենսդրական կարգավորումներին, ինչը հղի է պատգամավորին մտահոգող ռիսկերով»:
Բացի այդ, ընդդիմությունը դարձյալ բարձրաձայնեց ծառայողական պարտականությունները կատարելիս զոհված կամ հաշմանդամ դարձած զինծառայողների աջակցությունը հանրության ուժերով կազմակերպելու կառավարության առաջարկը:
Նրանց համոզմամբ` պետությունն իր պարտականությունը փորձում է բարդել քաղաքացիների ուսերին: Իսկ ԱԺ ՀՀԿ խմբակցության պատգամավոր Խոսրով Հարությունյանը, հակառակը` վստահ է, որ ՀՀ յուրաքանչյուր քաղաքացի պարտավոր է մասնակցել զինծառայողների ընտանիքներին օգնելու գործին:
Պատգամավոր Նիկոլ Փաշինյանն էլ մտահոգություն հայտնեց, որ զինծառայողների ընտանիքների անունով հավաքված գումարները երբեմն շատ ավելի մեծ ազդեցություն են թողնում այդ գումարները հավաքողների և ոչ թե հասցեատերերի վրա:
«Զոհված զինծառայողների ընտանիքները չպիտի լինեն օլիգարխների կամ որևէ մեկի բարեգործության հույսին։ Գնում են բարեգործություն են անում, սելֆիներ են անում, տարանք էս արեցինք, էն արեցինք, սա նվաստացուցիչ է այդ մարդկանց համար: Մենք այս 1000 դրամները իշխանությանը չենք տալիս, մենք տալիս ենք զինծառայողների ընտանիքներին: Մեր բանակը օգնության, կարեկցանքի օբյեկտ չէ: Ազատամարտիկի ընտանիքը չի կարող լինել կարեկցանքի օբյեկտ»,- ասաց Փաշինյանը:
Նշենք, որ ԱԺ-ն առաջին ընթերցմամբ արդեն ընդունել է զինծառայողներին աջակցող հիմնադրամ ստեղծելու մասին նախագիծը։ Հիմնադրամի միջոցները ձևավորվելու են նվիրատվություններից, փոխառություններից, դրամաշնորհային գումարներից, հիմնադրամի սկզբնական միջոցներից, նաև յուրաքանչյուր աշխատող քաղաքացու աշխատավարձից պարտադիր գանձվող 1000 դրամ գումարից:
Զոհվածների և 1-ին խմբի հաշմանդամություն ստացած զինծառայողների ընտանիքները միանվագ կստանան 10 մլն դրամ, 2-րդ խմբի հաշմանդամները՝ 5 մլն, իսկ հետագայում՝ 20 տարվա ընթացքում, կստանան ամսական 300 հազար դրամ: Սպաների համար այդ գումարը կկազմի ամսական 300 հազար դրամ, ենթասպաների համար՝ 250 հազար դրամ, շարքայինների համար՝ 100 հազար դրամ: Այսինքն, սպային կամ նրա ընտանիքին 20 տարվա ընթացքում կհատկացվի 82 մլն դրամ, ենթասպաներին՝ 70 մլն, շարքայիններին՝ 58 մլն։ II խմբի հաշմանդամություն ստացած զինծառայողներն ամսական կստանան 200 հազար դրամ, 150 և 100 հազար դրամ համապատասխանաբար։ Դրամական միջոցները կստանան զինծառայողների ծնողներն ու երեխաները, ինչպես նաև մինչև 23 տարեկան եղբայրներն ու քույրերը։
