ԵՐԵՎԱՆ, 3 դեկտեմբերի — Sputnik, Լիլիթ Հարությունյան. Ավստրալացի դիվանագետ Մեթյու Գրիգսը զարմացրել է Մելբուրնում 50 կմ մարզական քայլքի առաջնությունում (Australian 50km Road Walk Championship)։
38-ամյա Գրիգսը վերջնագծին մոտեցել է հայկական դրոշը ձեռքին, որը ծածանվել է նրա ձեռքերում մինչև հաղթական ավարտը։ Հաղթանակից հետո նա գրկել է կնոջը` հայուհի Լիլիթ Աթոյանին։
Ավստրալացու հաղթանակը նշանակալի է նրանով, որ շուրջ կես տարի առաջ Գրիգսի ծունկը վիրահատել էին, ընդ որում հենց Հայաստանում։
«Վիրահատությունից հետո ես 95 կգ էի։ Տեղափոխվեցի Ավստրալիա, երբ կինս վիզա ստացավ և սկսեցի մարզվել միայն հունիսին։ Ես ցանկանում էի անցնել 50 կմ, նպատակ դրեցի առջև և ուղղակի ուզեցի մասնակցել։ Ես նույնիսկ չէի պատկերացնում, որ ինձ կհաջողվի անել դա։ Գիտեք, 50 կիլոմետրը լուրջ տարածություն է, 30 կմ-ից հետո ես արդեն չէի նայում ժամանակին, այլ ուղղակի շարունակում էի քայլել»,- ասել է Մեթյուն հաղթանակից հետո։
Նա կատակով նշել է, որ իր բախտը բերել, քանի որ օլիմպիադայի մասնակիցներն այդ ժամանակ հանգստանում էին։
Գրիգսի կինը` Լիլիթը, Sputnik Արմենիայի թղթակցին ասաց, որ Մեթյուն, առաջին հերթին, շնորհակալ է աջակցության համար իր հայ ընկերներին։
Նրա կարծիքով` իր ամուսնու արարքը կնպաստի Հայաստանի ճանաչելիությանը։ Նա Facebook-ի իր էջում գրել է, որ ավստրալացիների շարքում քիչ մարդիկ կան, որոնք ինչ-որ բան ես լսել Հայաստանի մասին։
«Վերջերս Մելբուրնում ծածանվում էր Հայաստանի դրոշը։ Ավստրալիայում 6 ամիս գտնվելու ընթացքում ես հանդիպեցի միայն հինգ հոգու, որոնք ինչ-որ բան գիտեին Հայաստանի մասին։ Մոտենալով վերջնագծին հայկական դրոշով` Մեթյու Գրիգսը գոռացել է «Հայաստա՛ն, հուպ տուր»։ Այժմ նա մարզական քայլքի Ավստրալիայի առաջնության ոսկե մեդալակիր է։ Նրա լուսանկարները` հայկական եռագույնով, հայտնվել են ավստրալիական, ինչպես նաև իտալական մարզական ԶԼՄ-ներում»,- գրել է Լիլիթը։
Մարզական քայլքի առաջնությունը տեղի է ունեցել Մելբուրնում դեկտեմբերի 11-ին։
