ԵՐԵՎԱՆ, 12 դեկտեմբերի — Sputnik, Լաուրա Սարգսյան. 2016 թվականի ռուսաց լեզվի պատվավոր ուսուցչու կոչմանն արժանացավ Գյումրու Պուշկինի անվան №6 դպրոցի ուսուցչուհի Ռուզաննա Շտոյանը։ Ռուսաց լեզվի 4000 ուսուցչից մրցույթի եզրափակիչ փուլ էին անցել միայն 27-ը։
«Արդեն 25 տարի է` դասավանդում եմ, մասնագիտությունս էլ պատահաբար չեմ ընտրել։ Ծնվել եմ Ղրիմում, իսկ Հայաստանում եմ 14 տարի»,- Sputnik Արմենիայի թղթակցին ասաց Շտոյանը։
Ռուզաննան մանկուց երազել է իրավաբան դառնալ, սակայն հետո միտքը փոխել է։ Մանկավարժությամբ սկսել է զբաղվել Գյումրու մանկավարժական ինստիտուտն ավարտելուց հետո։
Ռուսաց լեզվի լավագույն ուսուցչուհին կարծում է, որ ժամանակակից երեխաներն ավելի հեշտությամբ են սովորում օտար լեզուները, քանի որ տեղեկատվական աղբյուրները շատ ավելի հասանելի են դարձել։
Շտոյանը վստահ է, որ Հայաստանում ռուսաց լեզվի ուսուցման հետ կապված խնդիրներ չկան. «մեծ ու հզոր» այս լեզուն ամուր հիմքեր ունի մեր երկրում։
«Մենք մի մեծ առաքելություն ենք կատարում` երիտասարդ սերնդին հաղորդակից ենք դարձնում ազգային արժեքներին ու մեզ հարազատ ռուսաց լեզվին։ Իսկ նման ձևաչափով միջոցառումներն ուսուցչին ինքնակատարելագործման են մղում»,- ասաց Շտոյանը։
«Ռուսաց լեզվի լավագույն ուսուցիչ» անվանակարգը` Գիտության և մշակույթի ռուսական կենտրոնի (ԳՄՌԿ) հերթական նախագիծն է, որն ուղղված է երկկողմանի մարդասիրական համագործակցության խորացմանը։ «Ռուսաց լեզուն այսօր հայ և ռուս ժողովուրդների հաղորդակցման լեզուն է, և ռուսական խոսքի օրվա հիմնական նպատակը Հայաստանում ռուսաց լեզվի նկատմամբ հետաքրքրություն առաջացնելն է», — Sputnik Արմենիայի թղթակցի հետ զրույցում ասաց Հայաստանում ԳՄՌԿ ղեկավար Մարկ Կալինինը։
Նա կարևոր է համարում ռուսաց լեզվի ուսումնասիրությունը, քանի որ Հայաստանում խոշոր ռուսական բիզնես կա, որը աշխատատեղեր է ստեղծում։ Կալինինն ընդգծեց, որ դպրոցականների և դիմորդների շրջանում լեզվի տիրապետման մակարդակը բարձրացնելու համար անհրաժեշտ է մեծ ջանքեր գործադրել։
Ամեն տարի ԳՄՌԿ-ն կրթության նախարարության հետ համատեղ դիմորդների ուսուցում և նախապատրաստական ծրագիր է իրականացնում ռուսական առաջատար բուհերում։ Շուրջ 220 մարդ կարողանում է մեկնել Ռուսաստան բակալավրի, մագիստրատուրայի, ասպիրանտուրայի, օրդինատուրայի ծրագրով սովորելու համար։ «Ռուսաց լեզու» ծրագրի շրջանակում Հայաստանի բուհերն ու դպրոցները ուսումնամեթոդական գրականություն են ստանում Ռուսաստանից։ ԳՄՌԿ-ն մի քանի տարի առաջ գործարկել է «Նոր սերունդ» ծրագիրը, որի շրջանակում ավելի քան հարյուր երիտասարդ Հայաստանից մասնակցել է Ռուսաստանի խոշոր կրթական, մշակութային և գիտական միջոցառումներին։
Հայաստանում իրականացվող մարդասիրական նախածերից մեկն էլ մարզային դպրոցներին սնունդ մատակարարելն է։ Դպրոցական սննդի ծրագիրը ֆինանսավորվում է Ռուսաստանի միջոցների հաշվին` Երևանում ՄԱԿ-ի գրասենյակի միջոցով։
