ԼՂՀ Սահմանադրության նախագծի ընդունման դեպքում «Ղարաբաղ» անունը ոչ թե փոխարինվելու է «Արցախ»-ով, այլ երկուսն էլ զուգահեռ կիրառվելու են, բայց առավելությունը տրվելու է «Արցախի Հանրապետություն» տարբերակին: Sputnik Արմենիային ասաց ԼՂՀ վարչապետի մամուլի քարտուղար Արտակ Բեգլարյանը, որի նախաձեռնությամբ ԼՂՀ-ում պաշտոնական հաղորդագրություններում սկսել է շրջանառվել հատկապես «Արցախի Հանրապետություն» ձևակերպումը:
Ինչ վերաբերում է ԼՂՀ անվանափոխության շուրջ Ադրբեջանում բարձրացած աղմուկին, Արտակ Բեգլարյանը դրական է մեկնաբանում այն:
«Փաստորեն նրանք կարևորում են, թե մեր Սահմանադրության մեջ ինչ է գրված, ուրեմն փաստացի ընդունում են նաև մեր Սահմանադրությունը»,- ասաց մեր զրուցակիցը:
Այդուհանդերձ, միջազգային ասպարեզում այս անվանափոխությունը որևէ լուրջ խնդիր չի լուծի, Արտակ Բեգլարյանի համոզմամբ` նախնական շրջանում դեռ կշարունակեն կիրառել «Ղարաբաղ» անվանումը, մինչև, որ «Արցախ»-ն ավելի կիրառելի կդառնա նաև օտարների համար:
