ԵՐԵՎԱՆ, 31 հոկտեմբերի — Sputnik. Օտարերկրյա ուժերը հիմնականում լրագրողների ու հասարակական կազմակերպությունների միջոցով են սկսում պետական հեղաշրջումները, կարծում է «Միջազգային հումանիտար զարգացում» հասարակական կազմակերպության նախագահ Արման Ղուկասյանը։
Ղուկասյանի ղեկավարած կազմակերպության ուսումնասիրությունները պարզել են, որ դրսի, հիմնականում՝ ամերիկյան ուժերը ֆինանսավորում են Հայաստանում գործող որոշ լրատվամիջոցների և հասարակական կազմակերպությունների։
Տասնյակ հազար դոլարներ տրամադրելը տեղի է ունենում տարբեր պատրվակներով, սակայն նպատակը մեկն է՝ նպաստել պետության մեջ քաոս ստեղծելուն։
«Խիստ կասկածում եմ, որ գումար տրամադրելով՝ օտարերկրյա կազմակերպությունները շահագրգռված են Հայաստանում մամուլի ազատությանը նպաստել կամ մեր լրագրողների մասնագիտական որակը բարձրացնել։ Իրականում նրանք ցանկանում են ապակայունացնել երկիրը»,- ասաց Արմեն Ղուկասյանը։
Նա նշեց, որ բավական է մի փոքր խժդժություն լինի, մի քիչ լարվածություն առաջանա պետության ներսում, անկախ նրանից` դա քաղաքական է, թե այլ բնույթ է կրում, դրսից ֆինանսավորվող ԶԼՄ-ներն ու ՀԿ-ներն անմիջապես սկսում են կրքեր բորբոքել, խաղալ մարդկանց զգացմունքների հետ։
«Նրանք սոցիալական ցանցերում, հատկապես Ֆեյսբուքում, բազմաթիվ ֆեյքեր են բացում ու սկսում ապատեղեկատվություն տարածել։ Միաժամանակ ձեռք ձեռքի տված դուրս են գալիս փողոց ու սկսում շիկացնել մթնոլորտը, գործում են հատուկ ծրագրով»,- ասաց Ղուկասյանը` նկատելով, որ նրանք այդ գրանտները ստանում են հենց այդ նպատակով, որպեսզի ինֆորմացիան խեղաթյուրեն, վիճակը լարեն, մարդկանց դուրս բերեն փողոց և հեղաշրջման փորձեր կատարեն։
Գունավոր հեղափոխություններն, ըստ նրա, գրեթե նույն սցենարն ունեն բոլոր երկրներում։ Դա առավել հեշտ է իրագործել այնպիսի պետություններում, որտեղ քաղաքական ճգնաժամ է, սոցիալ-տնտեսական ծանր վիճակ, քաղաքացիները դժգոհ են իշխանություններից։
Ամերիկյան կառույցների իրական նպատակը առիթից օգտվելով պետություն քայքայելն է, կառավարելի քաոս ստեղծելը, ինչի ականատեսն ենք տարբեր երկրներում, նրանք նաև ազգային մտածողությունն են խեղաթյուրում, համոզված է Արման Ղուկասյանը։
Հայաստանում նա կանխատեսում է ոչ կայուն վիճակ Խորհրդարանի ընտրությունից առաջ, դրսից ֆինանսավորվող ներսի կազմակերպությունները կփորձեն սրել լարվածությունը։
