ԵՐԵՎԱՆ, 30 հոկտեմբերի — Sputnik. Ֆուտբոլի հայ երկրպագուները թույլ չեն տալիս, որ մարզիչներն աշխատեն, այս կարծիքն է հայտնել Հայաստանի ֆուտբոլի ֆեդերացիայի նախագահ Ռուբեն Հայրապետյանը Վանաձորի ֆուտբոլի ակադեմիայի բացումից հետո լրագրողների հետ զրույցում, հայտնում է armsport-ը:
«Մեր երկրպագուները թույլ չեն տալիս, որ մարզիչները աշխատեն: Վարուժան Սուքիասյանը խաղադաշտ չմտած արդեն գոռում են` Սուքիասյան, հեռացիր, այլ մարզչի անուն են գոռում: Դա շատ վատ է: Այսպես հավաքականի գլխավոր մարզիչ ոչ ոք չի ուզենա աշխատել, ինչպես Վարդան Մինասյանը չի ուզում»,- ասել է Հայրապետյանը:
Հայրապետյանը նշել է, որ ոչ ոք չի տեսնում, թե հավաքականը ինչու է վատ խաղում. 5-6 ֆուտբոլիստ վնասվածք ունի, մարզիչը ձախողվել է, «բայց խաղը չսկսված` գոռում են` Սուքիասյան, հեռացիր, ինչի՞ համար»:
«Ցանկալի է, իհարկե, որ Հայաստանի հավաքականը բոլորին հաղթի, բայց դա անհնար է: Մեր երկրպագուները դարձել են փորձանք հավաքականի գլխին: Հավաքականը լավ է խաղում, չգիտես ինչու վերագրում են իրենց, որ իրենք են ամեն ինչ արել: Կա այդպիսի մի խումբ, որ ասում են` իրենք են հավաքականին աջակցել լավ խաղերի ժամանակ, իսկ հենց հավաքականը վատ է խաղում, մարզիչն է մեղավոր, ֆեդերացիայի նախագահն է մեղավոր»,- ասել է ՀՖՖ նախագահը:
Բայց, նրա խոսքով, կան նաև վատ խաղալու օբյեկտիվ բազմաթիվ պատճառներ:
«Մարզիչը ուներ ուժեղ ֆուտբոլիստներ և չխաղացրե՞ց: Երկրորդ րոպեին տասը հոգով էինք մնացել, բնական է՝ չէինք կարող Ռումինիայի հետ հավասար պայքարել: Հորդորում եմ, ինչպես ամբողջ աշխարհում է, միանգամից չհարձակվեն մարզչի վրա: Թող լսեն մարզչին: Բոլորս տեսնում ենք պատճառները: Եթե չկա պատճառ, ու մարզիչը սխալ քայլեր է կատարել, դա ուրիշ բան: Մարզիչը ֆուտբոլիստ չունի»,- նշել է Հայրապետյանը:
Նա համոզված է, որ կային ֆուտբոլիստներ, ովքեր հավաքականի մարզաշապիկ չպետք է հագնեին, սակայն ստիպված հրավիրվել են, որովհետև 23 հոգին չէր լրանում:
