ԵՐԵՎԱՆ, 23 հոկտեմբերի — Sputnik. Հեղինակավոր գործարար Կոնստանտին Մանուկյանը, որին անվանում են օրենքով գող Զախարիա Կալաշովի (մականունը՝ Շաքրո Մոլոդոյ) «ստվերը», իրավապահ մարմինների տվյալով՝ թաքնվում է Հայաստանի տարածքում: Այս մասին գրում է «Երեկոյան Մոսկվան»:
«Մանուկյանն այժմ թաքնվում է Հայաստանի տարածքում: Նրա նկատմամբ հետախուզություն հայտարարելն անմիջականորեն կապված է Անվտանգության դաշնային ծառայության կողմից «Հանցավոր խմբավորման կազմակերպում» հոդվածով անցկացվող հետաքննության հետ, որի գլխավոր կասկածյալներից մեկը Կալաշովն է»,- գրում է հրատարակությունը:
Մանուկյանը Զախարիա Կալաշովի «ստվերն» է և ֆինանսների ու իշխանությունների ներկայացուցիչների հետ կապերի պատասխանատուն:
Նա նաև հայտնի է քրեական աշխարհում: Ծնվել է Վրաստանում, առաջին անգամ 1989թ-ին 15 տարվա ազատազրկման է դատապարտվել ազգությամբ քուրդ մեկ այլ «հեղինակության» սպանության համար: Նա վաղուց է կապված Շաքրո Մոլոդոյի հետ, որը ձերբակալվել է Իսպանիայում հանցավոր խմբավորում ստեղծելու և փողերի լվազման համար:
