ԵՐԵՎԱՆ, 18 հոկտեմբերի — Sputnik. Ղարաբաղի քառօրյա պատերազմից առավել տուժած գյուղը պաշտպանելու համար պատնեշ է կառուցվում։ Այս մասին լրագրողներին հայտնեց «Ազգային անվտանգություն» կուսակցության նախագահ Գառնիկ Իսագուլյանը:
Նրա խոսքով` այն թերությունները, որոնք հայտնաբերվել էին ապրիլյան պատերազմի ժամանակ, արագ վերացվում են:
«Թալիշ գյուղում բավական բարձր պատնեշ է կառուցվում, և մենք որոշել էինք, որ այդ պատնեշի բացումից հետո պետք է մի գիշեր անցկացնեինք այնտեղ, պետք է ևս 30 ընտանիք տանեինք բնակեցնելու, պարզապես դա ուղղակի մի քիչ հետաձգվեց որոշ խնդիրների պատճառով», — նշեց Իսագուլյանը:
Նրա խոսքով` Թալիշն անպայման վերաբնակեցվելու է:
Բացի այդ, ըստ Իսագուլյանի, կատարվում են աշխատանքներ, որոնց մասին չի խոսվում, բայց ամեն ինչ արվում է, որպեսզի ապրիլյան իրադարձությունները չկրկնվեն:
