ԵՐԵՎԱՆ, 2 հոկտեմբերի- Sputnik. «Հայֆեստ» ամենամյա միջազգային թատերական փառատոնն այս տարի նվիրված է Հայաստանի անկախության 25-րդ տարեդարձին և կրում է «Իրականացրու երազանքդ «Հայֆեստի» հետ» խորագիրը:
Փառատոնի մեկնարկն ազդարարվեց Կ. Ստանիսլավսկու անվան ռուսական դրամատիկական թատրոնում Տաշքենդի «Իլխոմ» դրամատիկական թատրոնի «Յոթ լուսին» ներկայացումով:
Ներկայացումից առաջ «Իլխոմ» թատրոնի գեղարվեստական ղեկավար Բորիս Գաֆուրովն լրագրողների հետ հանդիպմանն ասաց, որ թատերախումբն առաջին անգամ է հանդես գալու հայ հանդիսատեսի առաջ:
«Հայաստանում չենք եղել, բայց մշտապես ցանկացել ենք գալ Հայաստան, խաղալ հայ հանդիսատեսի համար: Վերջապես այստեղ ենք, և մեծ պատիվ է մեզ համար բացել փառատոնը»,- ասաց Բորիս Գաֆուրովը:
Բեմադրության հիմքում Ալիշեր Նավոյիի «Յոթ լուսին» ստեղծագործությունն է, և ինչպես Sputnik Արմենիայի հետ զրույցում ասաց «Հայֆեստի» նախագահ Արթուր Ղուկասյանը, ուզբեկական այս դրաման խոսքի, երաժշտության ու աղմուկի հետաքրքիր համադրություն է։ Ղուկասյանը նաև նշեց, որ Ուզբեկստանում թատրոնն անտեսված է պետության կողմից, ուստի «Իլխոն» ստիպված է պայքարել իր գոյության համար, և այդ պայքարի արդյունքում են ծնվում թատերախմբի հետաքրքիր մտահղացումները:
Փառատոնի ընթացքում հոկտեմբերի 1-8-ը հայ հանդիսատեսը երևանյան 12 բեմահարթակներում հնարավորություն կունենա տարբեր ոճի ու ժանրի շուրջ 50 ներկայացում դիտել՝ դրամատիկական, երաժշտական, պարային, մոնոներկայացումներ, մուլտիմեդիոն, տիկնիկային, մարիոնետների, կրկեսային, մանկական: Նախատեսված են նաև բացօթյա ներկայացումներ:
Փառատոնին մասնակցում է 20 երկրից ժամանած 250 հյուր, որոնց թվում` հեղինակավոր արվեստագետներ, արտմենեջերներ, միջազգային փառատոների նախագահներ։ Նրանք ժամանել են Մեծ Բրիտանիայից, ԱՄՆ-ից, Ֆրանսիայից, Լեհաստանից, Իսրայելից, Լիտվայից, Գերմանիայից, Չեխիայից, Նորվեգիայից, Հունաստանից, Ճապոնիայից, Ֆինլանդիայից, Ուզբեկստանից, Ղազախստանից, Ռուսաստանից, Իրանից, Վրաստանից և այլ երկրներից:
Փառատոնի նշանավոր ներկայացումներից են Սանկտ Պետերբուրգի «Նեբոլշոյ» դրամատիկական թատրոնի «Կարամազով եղբայրներ», Մաքսիմ Գորկու թատրոնի «Հոգիների աճուրդը» (բեմադրիչ՝ կանադահայ հայտնի դերասանուհի Արսինե Խանջյան) ներկայացումները:
Փառատոնին զուգահեռ Երևանի թատրոնի և կինոյի պետական ինստիտուտում կանցկացվի «Ժամանակակից թատրոնը» խորագրով գիտաժողով, որին կմասնակցեն ինչպես հայ թատերագետներ ու դասախոսներ, այնպես էլ փառատոնի շրջանակում Հայաստան ժամանած դերասաններ, թատրոնների ու փառատոների ղեկավարներ, ովքեր իրենց մասնագիտական փորձը կկիսեն հայ մասնագետների հետ:
