ԵՐԵՎԱՆ, 14 օգոստոսի — Sputnik. Հայ բռնցքամարտիկի մրցակիցը ռինգում ուգանդացի Ռոնալդ Սերուգոն էր, որ շատ մեծ փորձ էր կուտակել մինչ այս մենամարտը: Բավական է միայն նշել, որ Սերուգոն օլիմպիական խաղերին սկսել է մասնակցել ութ տարի առաջ՝ Պեկինում: Բոլոր դեպքերում 32-ամյա մրցակցի հետ հեշտ մենամարտ չէր սպասվում:
Առաջին ռաունդում Նարեկը մի փոքր ակտիվ էր: Ճիշտ է՝ դիպուկ հարվածների քանակն այնքան էլ շատ չէր, բայց Նարեկը որոշակի առավելություն ուներ:
Մեկ րոպեանոց ընդմիջումից հետո ուգանդացին ակտիվացավ, ու մրցավարներն արդեն մենամարտող կողմերից ոչ մեկին առավելություն չտվեցին: Փաստացի երրորդ ռաունդը դարձավ վճռական:
Եզրափակիչ ազդանշանից հետո դժվար էր գուշակել հաղթողին: Համարյա հավասար մենամարտ ստացվեց, ու մրցավարների որոշումն էլ մի փոքր ուշացավ: Ի վերջո պարզվեց, որ 2:1 հաշվով հաղթանակը շնորհվել է հայ բռնցքամարտիկին:
1/8 եզրափակիչում Նարեկ Աբգարյանը օգոստոսի 16-ին կմրցի չինացի Հու Յինգուանի հետ:
Հիշեցնենք, որ բռնցքամարտի օլիմպիական մրցումներում իրենց ելույթներն են շարունակում նաև 56կգ քաշային Արամ Ավագյանը և 64կգ քաշային Հովհաննես Բաչկովը:
