ԵՐԵՎԱՆ, 12 օգոստոսի — Sputnik, Անի Լիպարիտյան. Քաղաքական, տնտեսական, զբոսաշրջային և մշակութային հարաբերությունները Հայաստանի և Իրանի միջև տասնամյակների ընթացքում են կառուցվել, և վիզային ռեժիմի չեղարկումն անսպասելի չէր։ Այս մասին Sputnik Արմենիային ասաց ՀՀ էկոնոմիայի նախարարության զբոսաշրջության վարչության պետ Մեխակ Ապրեսյանը։
Նրա խոսքով` այդ որոշումն անկասկած դրական ազդեցություն կունենա երկու երկրի զբոսաշրջության, ինչպես նաև քաղաքական ու առևտրատնտեսական ցուցանիշների վրա։
«Հայաստանի և Իրանի հարաբերությունները երեկ չեն սկսվել, դա քաղաքական, առևտրա-տնտեսական, մշակութային ու զբոսաշրջային հարաբերութունների բազմադարյա պատմություն է»,- ասաց Ապրեսյանը։
Նա նշեց, որ մի քանի տարի առաջ ստեղծվեց հայ-իրանական համատեղ խումբ, որը զբաղվում է զբոսաշրջության ոլորտով։
«Ամեն տարի աշխատանքային խմբերը հանդիպումներ են ունենում երկու երկրում, քննարկում են արդի խնդիրները, նոր միջոցառումների անցկացումը։ Օրինակ` վերջերս պաշտոնական մակարդակով հուշագիր ստորագրվեց ՀՀ էկոնոմիկայի նախարարության և Իրանի պատմամշակութային ժառանգության, ձեռագործ արվեստի ու զբոսաշրջության կազմակերպության միջև»,- ասաց Ապրեսյանը։
Նա ավելացրեց, որ վիզային ռեժիմի չեղարկումը շատ լավ որոշում է բարեկամ երկրների ներկայացուցիչների հարաբերությունների զարգացման տեսանկյունից։ Հայերն ու իրանցիները կկարողանան ավելի լավ ճանաչել միմյանց, ծանոթանալ հարևան երկրի պատմամշակութային արժեքներին։
«Մարդիկ ազատվում են նաև թղթաբանական քաշքշուկներից, ինչը վստահություն է բերում»,- ասաց Ապրեսյանը։
Ըստ նրա` այս որոշումը երկար կյանք կունենա, քանի որ իրանցի հյուրերի ու գործարարների թիվը տարեցտարի աճում է, իսկ Իրան քաղաքացիներն իրենց ապահով են զգում հյուրնկալ Հայաստանում։ Նրա խոսքով` տարեկան 150 հազար իրանցի է այցելում Հայաստան։
Ապրեսյանն ավելացրեց, որ Հայաստանն իրանական շուկայում ակտիվացավ վերջին յոթ տարում, ու դրական դինամիկան արդեն ակնհայտ է։
