ԵՐԵՎԱՆ, 9 օգոստոսի — Sputnik. Լրագրողների հետ հանդիպմանը ՀՀ գյուղատնտեսության նախարարի տեղակալ Ռոբերտ Մակարյանը հայտարարեց, որ այս տարվա պտուղ-բանջարեղենի մթերման պահանջարկը կազմել է 71 282 տոննա, ինչը շուրջ 34 հազար տոննայով կամ 35 տոկոսով ավելի է նախորդ տարի մթերված բերքից:
Ագրարագյուղացիական միավորման նախագահ Հրաչյա Բերբերյանը, սակայն, պետական պաշտոնյայի լավատեսությունը չի կիսում: Ըստ նրա` այս տարվա բոստանային կուլտուրաների բերքն իրականում կրկնակի պակաս է նախորդ տարվանից:
«Լոլիկի բերքահավաքը նոր է սկսվում, բայց գինը տեղից չի շարժվում, ուստի ասել, որ մենք լոլիկի ռեկորդային բերք ունենք, իհարկե, ճիշտ չէ»,- Sputnik Արմենիայի թղթակցի հետ զրույցում ասաց Բերբերյանը ` գյուղնախարարությանը խորհուրդ տալով ժամանակից շուտ պատասխանատու հայտարարություններ չանել, նաև հիշեցրեց. «ճտերն աշնանն են հաշվում»:
«Որևէ խնդիր չունենք այսօր շտապելու և բերքահավաքը դեռ չավարտված` հայտարարելու, թե մենք անսահմանափակ լոլիկ կարող ենք մթերել, այն դեպքում, երբ դաշտերում ունենք խղճուկ վիճակ»,- ասաց Բերբերյանը` հիշեցնելով, որ տարվա ընթացքում տեղացած կարկուտների հետևանքով հանրապետության մի շարք գյուղեր ընդհանրապես զրկվել են բերքից:
Բերբերյանը նաև հիշեցրեց, որ գյուղացին դեռևս չի ստացել նախորդ տարվա բերքի մթերման դիմաց խոստացված գումարը: Վերամշակող ընկերությունների` գյուղացիներին ունեցած պարտքերի մասին պաշտոնական տվյալները ևս, նրա խոսքով, մի քանի անգամ ցածր են իրենց ունեցած տվյալներից:
Ինչ վերաբերում է արտահանման ցուցանիշներին, փոխնախարար Ռոբերտ Մակարյանի խոսքով, 2016 թվականի օգոստոսի 8-ի դրությամբ հանրապետությունից արտահանվել է 85 326 տոննա պտուղ-բանջարեղեն` 2015 թվականի նույն ժամանակահատվածում արտահանված 49 827 տոննայի փոխարեն: Բերբերյանն այս ցուցանիշին ևս թերահավատորեն է վերաբերվում, քանի որ այս տարի Վերին Լարսի ճանապարհի փակ լինելու պատճառով Հայաստանից դուրս եկած բերքի մեծ մասը տեղ չի հասել:
«Պատկերացրեք` բերքի մի հսկա խմբաքանակ մենք կորցրել ենք, բայց դրա մասին այսօր չեն խոսում»,- ասաց Բերբերյանը։
Նրա խոսքով` բերքի ստացման, մթերման ու արտահանման իրական ցուցանիշներն իր ղեկավարած հասարակական կազմակերպությունը կամփոփի և կներկայացնի միայն աշնանը` խաղողի, լոլիկի և ցորենի բերքահավաքի ավարտից հետո:
