ԵՐԵՎԱՆ, 13 հուլիսի-Sputnik. Երևանում շարունակվում է «Ոսկե ծիրան» միջազգային կինոփառատոնը։ Այսօր տեղի ունեցավ «Վերջին բնակիչը» ֆիլմի ռեժիսոր Ջիվան Ավետիսյանի մամուլի ասուլիսը։ Լրագրողների բազմաթիվ հարցերին ֆիլմի հեղինակի հետ միասին պատասխանեց նաև գլխավոր դերասաններից մեկը` իրանցի դերասան Հոմայուն Էրշադին։
Մեկ ժամ անց «Ոսկե ծիրանի» մամուլի կենտրոնում լրագրողների հետ շփվեց նաև վրացի ռեժիսոր Նինո Բասիլիան։ Նրա «Աննայի կյանքը» ֆիլմը մասնակցում է խաղարկային կինոյի մրցութային ծրագրին։ Սոցիալական դրամայի ժանրում նկարահանված ֆիլմը պատմում է միայնակ մոր դժվար կյանքի մասին, ով փորձում է դուրս պրծնել սոցիալական խնդիրների փակ շրջանից։
Այսօր Մայր աթոռ սուրբ Էջմիածնի Գևորգյան հոգևոր ճեմարանում տեղի ունեցավ փառատոնի գլխավոր պարգևներից մեկի` «Եղեցի լույսի» հանձնումը։ Այս տարի այն շնորհվեց կինոռեժիսոր Ռոման Բալայանին։
Կինոյի անվանի գործիչները չեն մոռանում նաև վարպետության դասերի մասին։ Այսօր ուշադրության կենտրոնում էր վավերագրող ռեժիսոր Վիտալի Մանսկին։ Նրա «Արևի շողերի տակ» ֆիլմը բուռն բանավեճեր առաջացրեց կինոսիրողների շրջանում։ Հանդիսատեսն առիթը բաց չթողեց նշելու ռեժիսորի համարձակությունը, որը ֆիլմը նկարահանել է Հյուսիսային Կորեայում։ Մանսկին պատմել էր իրադարձությունների մասին, որոնց ականատես էր դարձել, և որոնք չէին ընդգրկվել ֆիլմի մեջ, ինչպես նաև այդ երկրի կյանքն էր ներկայացրել։
Լեհական կինոյի օրը նշանավորվեց Անջեյ Ժուլավսկու «Տիեզերք» ֆիլմի ցուցադրությամբ, որը վերջինն է նրա սյուրռեալիստական կինոպատումում։
Իսկ չորրորդ փառատոնային օրվա գլխավոր զարդը դարձավ համաշխարհային կինեմատոգրաֆի աստղը` Ժակլին Բիսեթը։ Դերասանուհու այցելության պատվին փառատոնը կազմակերպել էր նրա մասնակցությամբ ֆիլմերի հետահայաց ցուցադրություն։ Այն սկսվեց ֆրանսիական կինոյի դասական Ֆրանսուա Տրյուֆոյի «Ամերիկյան գիշեր» ֆիլմի ցուցադրությամբ։
