Նելլի Դանիելյան, Sputnik.
Աչքից 1 մլրդ անգամ ավելի հզոր ընդունիչը` աստղադիտակը, մարդուն փոխանցում է ոչ թե իրական երկնային լուսատուների պատկերները, այլ դրանց արտապատկերը։
«Դիտակը չի մոտեցնում աստղերը, այլ միայն մեզ է փոխանցում դրա արդեն հստակեցված պատկերը»,- բացատրում է Աստղադիտարանի գիտաշխատող, աստղագետ, գիտությունների թեկնածու Գաբրիել Օհանյանը։
«Առանց այդ էլ աստղալից երկինքը գիշերը մի հրաշքի է վերածվում։ Դրան գումարած նաև նոր բացահայտումներ ես անում։ Դիտակով երևում է այն, ինչ անզեն աչքով չի երևում»,- ասում է աստղագետը։
Բայց լինում են այցելուներ, ովքեր աստղադիտակով երկինքը դիտելուց հետո հիասթափվում են ու անգամ ափսոսանք հայտնում, որ գիշերով հասել են Բյուրական։
«Դա նորմալ է, որ հիասթափվում են։ Մարդիկ մի բան են երևակայում, որ կարծում են` այստեղ պիտի տեսնեն, գալիս են, ուզում են դիտակով էլ նույնը տեսնեն, նույնը չի երևում, հիասթափվում են»,- ասում է նա ու խոստովանում, որ հիասթափվողները հիմնականում հայաստանցիներն են։ Իսկ օտարերկրյա զբոսաշրջիկները շատ ավելի արագ են դուրս գալիս երևակայական դաշտից ու ընկալում իրողությունը։
