ԵՐԵՎԱՆ, 31 մայիսի – Sputnik. Ռուսական գազը Հայաստանի սահմանն ապրիլի 1-ից սկսած հատում է 1000 խմ-ի դիմաց 150 դոլարով։ Իսկ արդեն հանրապետության ներսում խոշոր սպառողներին վաճառվում է 257.56 դոլարով։ Թե ինչու է գազը սահմանից այս կողմ կտրուկ թանկանում, այսօր լրագրողների հետ զրույցում մեկնաբանեց «Գազպրոմ Արմենիա» ընկերության գլխավոր տնօրեն Վարդան Հարությունյանը։
Նրա խոսքով`վերջնական սակագնի ձևավորման վրա էապես ազդում են հիմնականում պահպանման ու շահագործման ծախսերն ու ներդրումները։
«Այսօր մենք գազատրանսպորտային համակարգում ունենք 50 տարվա խողովակներ։ Դրանք մեր պապերի թողած խողովակներն են։ Ոչինչ չե՞ք ուզում, որ կառուցենք, ոչինչ չթողնե՞նք մեր սերունդներին»,- ասաց ընկերության տնօրենը։
Ի դեպ, այսօր գազի սակագնի հաստատման հարցով ՀԾԿՀ-ի նիստում հայտարարվեց, որ «Գազպրոմ Արմենիան» գազամատակարարման համակարգի վերազինման, կապիտալ վերանորոգման ու պահպանման նպատակով այս տարի 7 մլրդ դրամ է նախատեսել։ Բայց ՀԾԿՀ-ում որոշել են, որ այդ գումարը քիչ է և պետք է ավելացնել։
«Հանձնաժողովի աշխատակազմի գնահատմամբ, «Գազպրոմ Արմենիայի» կողմից պահպանվող եկամուտը պետք է կազմի 8.9 մլրդ դրամ` ընկերության կողմից գնահատված 7 միլիարդի փոխարեն»,- հանձնաժողովի նիստում զեկուցեց Սակագնային քաղաքականության վարչության պետ Գարեգին Բաղրամյանը։
«Գազպրոմ Արմենիայի» մշակած գազամատակարարման զարգացման գլխավոր հատակագիծը, որում ներկայացված են մինչև 2030թ.-ը նախանշված ներդրումները, արդեն ներկայացվել է կառավարության հաստատմանը։ Ընկերության գլխավոր տնօրեն Վարդան Հարությունյանի խոսքով`դրանում հստակ ներկայացված է, թե «Գազպրոմ Արմենիան» որ թվականին ինչ աշխատանքներ ու ինչ գումարով պետք է իրականացնի։
