ԵՐԵՎԱՆ, 3 ապրիլի — Sputnik. Արծրուն Հովհաննիսյանը հեռու է մնում այն պատասխանատու հայտարարությունից, որ զորքի պահանջարկի բոլոր հարցերն իդեալական վիճակում են։ Սակայն նա խոսքով` ասել, թե որևէ երկրի զորքը կարող է հպարտանալ խնդիրների բացակայությամբ, իրատեսական չէ։ Ինչ վերաբերում է անհրաժեշտ զենք-զինամթերքով ապահովված լինելուն, Հովհաննիսյանն ասաց.
«Մեր զինանոցում կան զենքեր, որոնք լավն են, կարևոր ու նաև շատերի համար երազելի։ Ո՛չ հագուստի, ո՛չ զենքի խնդիր չկա»։
Ի վերջո, ըստ Հովհաննիսյանի, առանց զենքի հաղթանակներ չեն լինում։
«ԶՈՒ-ի մարտունակության մեջ ոգին շատ կարևոր է, բայց ծառայած տղաները լավ գիտեն, որ ոգին տնից չեն բերում։ Երբ հրամանատարն ու զինվորը դիպուկ կրակելու հմտություն են ձեռք բերում, դա ոգի է տալիս»։
Նա ավելացրեց, որ շատ կարևոր է մարտական պատրաստության ու հրամանատարական կառավարման գործոնը:
Արծրուն Հովհաննիսյանն անդրադարձավ նաև տեսադիտման սարքերի բացակայության մասին լուրերին` ասելով, որ արդեն 3-4 տարի է` զորքերը համալրվում են հարյուրավոր գիշերային տեսադիտման սարքերով, ավելին` անընդհատ սերնդափոխություն է իրականացվում։
Հովհաննիսյանն անդրադարձավ նաև 80–ականների զենքը շահարկելու թեմային։ Նրա խոսքով` 80–ականների զենք ասելով` չի նշանակում, որ դա հին զենք է։
«Եթե նշվում է, որ մենք 80–ականների զենքով ենք կռվում, ավելին` մենք 60–ականների զենքով էլ ենք հաղթանակ տանում։ Աշխարհի լավագույն զենքերը մնում են 80–ականների զենքերը»,–ասաց նա։ Նա խնդրեց ձեռնպահ մնալ զենքին «սահմռկեցուցիչ» անվանումը տալ։ Քանի որ եթե մարդկային միտքն ունակ է ստեղծելու որևէ զենք, ապա գտնում է նաև դրա «հակաթույնը»։ Փորձը ցույց տվեց, որ մի քանի օրվա ընթացքում հայկական կողմը 14 ԱԹՍ է խոցել։
