ԵՐԵՎԱՆ, 19 ապրիլի — Sputnik. ՀՀ նախագահ Սերժ Սարգսյանը և ԼՂՀ նախագահ Բակո Սահակյանը Լեռնային Ղարաբաղի Հանրապետությունում այցելել են Պաշտպանության բանակի զորամասերից մեկը, հայտնում է ՀՀ նախագահի մամուլի ծառայությունը։
Ըստ հաղորդագրության` ապրիլի 2-5-ն ընկած ժամանակահատվածում հակառակորդի սանձազերծած ռազմական գործողությունների ընթացքում ԼՂՀ պետական սահմանը պաշտպանելիս ցուցաբերած արիության ու խիզախության համար պետական պարգևներ հանձնել մի խումբ զինծառայողների:
Հայրենիքի սահմանները պաշտպանելիս ցուցաբերած բացառիկ խիզախության, անձնուրաց քաջության և անմնացորդ նվիրումի համար «Մարտական խաչ» 1-ին աստիճանի շքանշանով են պարգևատրվել` N զորամասի ծառայության պետ, գնդապետ Գենադի Բաղդասարյանը, զորամասի հրամանատարի տեղակալ, գնդապետ Արարատ Մելքումյանը, զորամասի ջոկատի հրամանատար, փոխգնդապետ Արտյոմ Գևորգյանը, զորամասի գումարտակի հրամանատար, մայոր Էդիկ Մալոյանը, զորամասի վաշտի հրամանատար, մայոր Արարատ Բաղդասարյանը, զորամասի ժամկետային զինծառայող, սերժանտ Մարատ Պետրոսյանը:
«Մարտական խաչ» 2-րդ աստիճանի շքանշանով են պարգևատրվել` N զորամասի հրամանատարի տեղակալ, գնդապետ Նորայր Ասլանյանը, զորամասի հրամանատարի տեղակալ, գնդապետ Սերգեյ Առուստամյանը, զորամասի հրամանատար, փոխգնդապետ Մարտին Ջհանգիրյանը, զորամասի ծառայության պետ, մայոր Արամ Պողոսյանը, զորամասի հրամանատարի տեղակալ, մայոր Արթուր Հովսեփյանը, զորամասի վաշտի հրամանատար, կապիտան Արման Ադամյանը, զորամասի դասակի հրամանատար, ավագ լեյտենանտ Ռոման Ադամյանը, զորամասի խմբի հրամանատարի տեղակալ, կրտսեր սերժանտ Ռազմիկ Գասպարյանը, զորամասի ժամկետային զինծառայող, սերժանտ Շուլի Հակոբյանը, զորամասի ժամկետային զինծառայող, կրտսեր սերժանտ Արթուր Աղասյանը, զորամասի ժամկետային զինծառայող, շարքային Հարություն Բադալյանը, զորամասի ժամկետային զինծառայող, շարքային Նարեկ Մալխասյանը:
Մարտական ծառայության մեդալով են պարգևատրվել` N զորամասի վաշտի հրամանատարի տեղակալ, կապիտան Արայիկ Պողոսյանը, զորամասի խմբի հրամանատար, լեյտենանտ Ռոբերտ Բաղյանը, զորամասի պայմանագրային զինծառայող, շարքային Ռուդիկ Մալխասյանը:
Հայկական երկու հանրապետությունների նախագահներն այցելել են նաև Ստեփանակերտի կենտրոնական զինվորական հոսպիտալ, որտեղ բուժում է ստանում Արիության մեդալով պարգևատրված ժամկետային զինծառայող, կրտսեր սերժանտ Վրեժ Բզնունին: ՀՀ նախագահը զինծառայողին հանձնել է պետական բարձր պարգևը, շնորհակալություն հայտնել և մաղթել նրան շուտափույթ ապաքինում:
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին պայմանավորվածություն է ձեռք բերվել ռազմական գործողությունները դադարեցնելու մասին, սակայն երկու կողմն էլ հայտարարում է, որ փոխադարձ պայմանավորվածությունը խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
