ԵՐԵՎԱՆ, 6 ապրիլի — Sputnik. Պարգև արքեպիսկոպոս Մարտիրոսյանը հատկանշական է համարում, որ հայ ժողովուրդն ինքնաբուխ է արձագանքել ղարաբաղյան դեպքերին, ոչ ոք նրան չի խնդրել մեկնել Ղարաբաղ` առաջին գիծ։
«Ամեն մեկն ինքնուրույն, ինքնակազմակերպված եկավ, կանգնեց: Այ սա չչափազանցնեմ` սուրբ ազգ է։ Դա մեծ հայրենասիրությունից է գալիս, դա ձեռքբերովի բան չէ, բայց այդ հայրենասիրությունը վերածվում է և՛ տաղանդի, և՛ խիզախության, և ունակության, երբ դու պատրաստակամ ես կյանքդ զոհաբերել առանց մտածելու, Աստված քեզ ամեն ինչ տալիս է»,-ասել է նա։
Պարգև արքեպիսկոպոս Մարտիրոսյանն ընդգծեց նաև հոգևորականների դերը` ավելացնելով, որ վերջիններս նույնպես մեկնել են առաջնագիծ։ Դա նախապատմություն ունի. նույն կերպ են արձագանքել նաև 5-րդ դարում, 20-րդի սկզբին` Սարդարապատի ու արցախյան պատերազմի 4 տարիներին: Տեղեկացնենք, որ այս օրերին առաջնագիծ ու Ղարաբաղի տարբեր զորամասեր է մեկնել 45 հոգևորական։
