ԵՐԵՎԱՆ, 17 մարտի — Sputnik. Երևանի քաղաքապետ Տարոն Մարգարյանը երևանցիներին առաջարկել է ֆեյսբուքի իր էջում գրել իրենց հետաքրքրող հարցերը և խոստացել է պատասխանել դրանց։
«Այս պահից սկսած մինչև վաղը երեկոյան ժամը 18:00-ն /24 ժամ/ ֆեյսբուքյան իմ էջում կարող եք գրել ձեզ հուզող ու հետաքրքրող հարցերը, որոնց կպատասխանեմ աշխատանքից հետո՝ առաջիկա հանգստյան օրերին»,- գրել է Մարգարյանը:
Նա համոզված է, որ խնդիրների մասին պարզ ու կառուցողական խոսելով, հարցեր բարձրացնելով, քննարկելով ու համագործակցելով՝ հնարավոր է նոր ձեռքբերումներ գրանցել Երևանի համար՝ դարձնելով այն ավելի հարմարավետ ու ժամանակի պահանջին համահունչ:
Այս նախաձեռնությունը նա բացատրել է նրանով, որ վերջերս մեկ ամիս շարունակ արտահերթ խորհրդակցությունների շարք է անցկացրել քաղաքապետարանի բոլոր վարչությունների և ստորաբաժանումների աշխատակիցների հետ` ուսումնասիրելով 2015թ. հաշվետվությունները: Նպատակը մեկն էր. վերլուծել մայրաքաղաքի բնականոն կյանքի ապահովման պատասխանատուների կատարած աշխատանքները, ինչպես նաև մատնանշել բացթողումներն ու թերացումները` դրանք շտկելու համար:
«Այդ առումով հաշվետվություններին հաջորդող շրջանը լավագույն ժամանակն է նման ձևաչափի քննարկում ծավալելու համար»,- համոզված է քաղաքապետը:
Ըստ նրա` ինքը որոշել է համաքաղաքացիների հետ նաև ուղիղ հարց ու պատասխանի ձևաչափով խոսել, թեև աշխատանքային շրջայցերի ու հանդիպումների ժամանակ ու ոչ աշխատանքային պայմաններում մշտապես հասանելի է բոլոր համաքաղաքացիների համար:
«Պարզապես ժամանակի պահանջն է ոչ միայն մարդկանց հետ խոսել ու հաշվետու լինել, այլև միասին սահմանել առաջնահերթությունները, ինչը հնարավոր է նաև քաղաքացիների հետ ուղիղ հարց ու պատասխանի միջոցով»,-ընդգծել է Մարգարյանը:
